“Дагъустандин экономика” телеграм-каналди, РД-дин хуьруьн майишатдинни суьрсетдин министерстводин пресс-къуллугъдал асаслу яз хабар гузвайвал, 2023-йисуз республикада багъманчивилиз куьмек яз 457 миллион манат харжда. Ведомстводин регьбер Мухтарбий Аджекован гафаралди, 2022-йисав гекъигайла, и рекъем 75 процентдин гзаф я.
Кьилди къачуртIа, икьван гагьда 1 гектар лап гзаф бегьер гудай (суперинтенсивный) багъ кутун патал куьмек яз 720 агъзур манат гузвайтIа, гила адан кьадар 1 миллион манатдиз барабар хьанва.
М.Аджекова къейд авурвал, эхиримжи вад йисуз республикада 5,6 агъзур гектарда багълар кутунва, абурукай 2,6 агъзур гектарда кутунвайбур гзаф бегьер гудай (интенсивный) жуьрединбур я. Лап гзаф бегьер гудай багъларин майданар лагьайтIа, 815 гектардив агакьнава.
Гьазурайди — Муса Агьмедов
