Алай йисан 1-июндилай “Победа” авиакомпанияди сифте сеферда яз Махачкъаладин ва Туьркиядин Анталья шегьердин арада дуьз рейсер кардик кутада. Идакай Махачкъаладин “Уйташ” аэропортунин пресс-къуллугъди хабар гузва.
Къейдзавайвал, рейсер “Boeing 737-800” самолетра аваз ислен, хемис ва киш йикъара тамамарда. Алай вахтунда рейсерин расписание ихьтинди я: Махачкъаладин аэропортунай самолёт нисинин сятдин 12-даз экъечIда ва Антальядиз сятдин 3 жез 13 декьикьа амайла, агакьда. Рекье жедай вахт 2 сятни 45 декьикьадиз барабар я. Антальядай элкъвена самолет йикъан сятдин 4-даз 15 декьикьа кIвалахайла экъечIда ва Махачкъаладив 6 жез 15 декьикьа амайла агакьда. Анихъай инихъ рекьиз 2 сятни 30 декьикьа серфда. Билетдин къимет 10 205 манатдилай виниз я.
Идалайни гъейри, Махачкъаладин аэропортунай дуьз рейсер са жерге маса уьлквейризни: Къазахстандиз, Азербайжандиз, Къиргъизистандиз, Узбекистандиз, гьакIни Дубай, Тель-Авив шегьерриз тамамарзава.
Дагъустандиз тамамарзавай рейсерин кьадар Nordwind авиакомпаниядини артухарзава. Компаниядин генеральный директордин заместитель Антон Маттиса малумарайвал, алай йисан гатфариз-гатуз Махачкъаладай Россиядин шегьерриз тамамарзавай рейсерин (рекьерин) кьадар 14-дав агакьдалди артухарда.
“Казандиз, Уфадиз, Нижний Новгороддиз, Москвадиз, Санкт-Петербургдиз ва Самарадиз тир маршрутрал гила Екатеринбургдиз, Красноярскдиз, Новосибирскдиз, Омскдиз, Оренбургдиз, Пермдиз, Тюмендиз, Челябинскдиз тир маршрутар алава хъжеда”, — лагьана ада.
“Кавказдин гевгьер”
Алай йисуз туристар паталди тир “Кавказдин гевгьер” поезд Москвадай Дагъустандиз 2-майдилай сентябрдин эхирдалди тайин йикъара рекье гьатда. Идакай РД-дин Минтуризмдин пресс-къуллугъди хабар гузва.
“Кавказдин гевгьер” ирид юкъуз ракьун рекьяй давам жедай ва “РЖД” холдингди туькIуьрнавай махсус маршрутдай кьиле фидай сиягьат я. ИкI, поезд Москва-Майкоп-Владикавказ-Грозный-Махачкъала-Дербент-Нальчик-Москва рекье къекъведа.
Сиягьат ийизвай пассажирривай дагъдин кукIушриз, рагарилай авахьзавай чарчарриз, гуьзел дерейриз ва дагьарриз килигиз жеда. Са гьафтедин вахтунда абуруз, санлай къачурла, вири Кавказдихъ, адан культурадихъ, адетрихъ галаз таниш жедай мумкинвал жеда.
Дагъустан Республикадикай рахайтIа, ина туристриз “Нарын-къеле” цитадель, Сулакдин дагьар, Европада виридалайни чIехиди тир Сары-Къум къумлух, надир са жерге маса гуьрчег чкаяр аквада.
Сейрдин расписание а жуьреда туькIуьрнава хьи, юкъуз туристривай экскурсийриз физ, йиф лагьайтIа, поездда акъудиз (ам чархарал алай мугьманхана хьиз ишлемишиз) жеда.
Мукьуфдивди ахтармишзава
2023-йисан эвелдилай Россельхознадзордин РД-да авай управлениди региондиз къецепатай гъанвай хуьруьн майишатдин культурайрин 329 тонн тумар ахтармишнава. Идакай идарадин пресс-къуллугъди хабар гузва.
Къейдзавайвал, тумар карантиндиз талукь тир сертификатар галаз рекье тунвай — абур делилрин “Аргус-Фито” ФГИС системада къалурнавай.
“Виридалайни гзаф тумар Краснодардин ва Ставрополдин крайрай, Ростовдин областдай, Кабардино-Балкариядай, Саратовдин ва Белгороддин областрай гъанва. Санлай къачурла, республикадиз 4,5 тонн гьажибугъдадин, 80 тонн мухан, 1 тонн горчицадин, 239 тонн прунздин, 4 тонн Судандин хъчарин тумар гъанва. Идалайни гъейри, региондиз чуьхверрин — 59 агъзурни 740, чумалрин — 400, ичерин 650 къелем ва дувулар ягъ тавунвай 50 агъзур чубук агакьнава”, — лугьузва малуматда.
Россельхознадзордин управлениди хабар гузвайвал, идаради цун патал республикадиз гъизвай тумарин ва къелемрин ери тестикьарзавай документар датIана мукьуфдивди ахтармишзава.
Чи мухбир
