ЧIехи Гъалибвилин 78 йис мукьвал жердавай РагъакIидай патан Европадин ва гьакI маса континентрин бязи уьлквейра Дуьньядин кьвед лагьай ва Ватандин ЧIехи дявейрин нетижаяр шаклувилик кутазвайбур гзаф жезва. Ихьтин мисалар иллаки Прибалтикадин республикайра, Украинада, Польшада гзаф ава.
Гьар садаз чир хьун лазим я, миллионралди къурбандриз рехъ гайи, гзаф кьадар хуьрер, шегьерар, карханаяр харапIайриз элкъуьрай, терг авур дяведа къачур Гъалибвал, къе бязибуру фикирзавайвал, чи бубайрин гъиле вич вичелай, регьятдиз гьатайди туш. Чи халкьар ва Яру Армия патал дяведин гьар са югъ четинди, къияматдинди хьана. 1943-йисан са югъ рикIел хкин.
Верховный Главнокомандованидин Ставкади Кьибледин фронтдиз ва Закавказьедин фронтдин кеферпатан группадин кьушунриз Батайскдал, Азовдал гьужум авунин, душмандин “А” армиядин группайриз Ростовдихъ фидай рекьер агалунин тапшуругъ гана.
Ленинграддин фронтдин 67-армияди душмандин гьалкъадай экъечIун патал нубатдин гьужумдик кьил кутуна. Артиллериядин дивизионри душмандин сенгерар ягъайдалай гуьгъуьниз сятдин 11-даз армиядин ударный группировкайри гьужум давамарна. Къизгъин женгер кьиле тухуналди, фашистрин гьужумар алудуналди, чи кьушунри виликди гьерекатна. И кар регьят акъвазначир. Кьушунрикай 257 кас хкатна, 616 аскердал хирер хьана.
Волховдин фронтдин ударный 2-армиядин кьушунри Синявино кьун патал алахъунар авуна. Абурулай душмандин лап мягькем сенгеррай пад акъудиз алакьна.
Кьибледин фронтдин кьушунри 23-январдиз Умань, Пустошкин, Самодуровка, Резников, Красный хуьрерин, шегьеррин патарив душмандин танкарихъ ва кьушунрихъ галаз лап къизгъин женгер кьиле тухвана. Нетижада советрин аскерар Зеленая Роща, Тузлуков, Красное Знамя терефрихъ гьужумдиз фена ва 51, 28 лагьай армийри Красный Маныч, Целина хуьрер кьуна.
Хийир Эмиров
