Дахди — хциз, бубади — хтулдиз, са несилри муькуьбуруз тазвай виридалайни багьа ва пак ивиррин жергедик рикIера амукьдай, чешне къачуниз лайихлу, мешреблу крарни акатзава. Вичикай къени фикирар тунвай инсанрикай сад яз Кебир Межидович Гьасанован тIварни кьаз жеда.
Ам виликан Самурский округдин Чахчарин хуьре 1911-йисан 13-ноябрдиз лежбердин хизанда дидедиз хьана. Юкьван школа куьтягьай 1930-йисуз са тIимил вахтунда комсомолрин кьиле акъвазна. Ахпа Махачкъалада пединститутдин тарихдин факультет акьалтIарна, меркездин школайрикай сана муаллимвиле, директорвиле, шегьердин халкьдин образованидин отделдин заведующийвиле, исполкомдин председателвиле кIвалахна. 1941-йисан январдилай 1942-йисан августдалди Кебир Межидович Махачкъала шегьердин исполкомдин кьиле акъвазна. 1942-1944-йисара адакай ВКП(б)-дин Дагъустандин обкомдин кадрийрин отделдин заведующийдин заместитель, 1944-йисан майдилай 1959-йисан октябрдалди кадрийрин рекьяй Дагъустандин къенепатан крарин министрдин заместитель хьана. 1951-йисуз ада СССР-дин МВД-дин высший офицервилин школа акьалтIарна. 1952-йисуз СССР-дин МВД-дин приказдалди полковниквилин чин гана. Иллаки Дагъустандин къенепатан крарин министрдин заместитель тирла, Кебир Межидовича вич инсанрин рикIера гьамиша амукьдайвал кIвалахна.
УГПС-дин (Управление государственной пожарной службы) ветеранрин Советдин председатель, РД-дин МВД-дин ОПО-дин начальникдин заместитель, къенепатан къуллугъдин отставкада авай подполковник С.С.Алистанова адакай икI лугьузва: “Зи хуьруьнви Кебир Межидович Гьасанов гзаф намуслу, чарадан дердиникай хабар кьадай къени инсан тир. Ада пожарно-технический училищедиз фин патал куьмек гайиди за садрани рикIелай алуддач”.
РД-дин ОВД-дин ветеранрин Советдин председатель, РД-дин къенепатан крарин министрдин виликан заместитель, къенепатан къуллугъдин полковник, гьа девирда министерстводин аппаратда кIвалахай Алиев Абдулбасир Мегьамедовича ингье вуч лугьузватIа: “Кебир Межидович миллетдал гьалтайла лезги, руьгьдин жигьетдай — интернационалист, ахлакьдин рекьяй виридаз чешне тир. Ам, зегьметдал гзаф рикI хьуналди, амайбурулай тафаватлу жедай.
РД-дин МВД-дин ОБХСС-да оперуполномоченный тир вахтунда зун адан патав жуван хсуси месэла гваз са шумуд сеферда фенай. КIвалахар туькIвеначиртIани, заз кIандайвал жезвачиртIани, зун кабинетдай адан руьгьдин чимивал гваз экъечIдай. Ам жегьил пешекаррив гьуьрметдивди эгечIдай. Зи бейнида ам гьахьтин кас яз амукьна”.
МВД-дин отделдин виликан начальник С.Сикоева рикIел хкизва: “Зи рикIел Кебир Межидовича гьикI кIвалахдайтIа, кадрияр хкягъунив, абур тербияламишунив гьикI эгечIдайтIа лап хъсандиз алама. Са вахтара и ва я маса месэла гьикI гьялдатIа кьил акъат тийидайла, за жува-жуваз суал гудай: яраб и дуьшуьшда Кебир Межидовича вуч ийидайтIа? Адалай гуьгъуьниз месэла, дугъриданни, гьял жедай”.
Кебир Межидовичакай кхьин патал къелем гъиле кьадалди за ам чидай, адахъ галаз кIвалахай гзафбурухъ, ветеранрихъ галаз суьгьбетарна. Абурун виридан рикIел ам хъсан тешкилатчивилин алакьунар авай камаллу регьбер, гьа са вахтунда михьи, хъсан къилихрин, регьимлу насигьатчи ва хуш суьгьбетчи хьиз алама.
Адаз са шумуд чIал чидай. К.Гьасанов Махачкъала шегьердин Советдин депутатни хьанай. Адан гьакъисагъ зегьметдиз лайихлу къиметни тагана тунвач. Ам “Гьуьрметдин Знак” ордендин, “Кавказ хуьнай”, “Германиядин винел гъалиб хьунай”, “Советрин Армиядин ва ВМФ-дин 30 йис”, “МВД-да гьакъисагъвилелди гъуллугъ авунай” медалрин ва гьуьрметдин грамотайрин сагьиб тир.
Адан уьмуьрдин юлдаш Нина Андреевнади Даггосуниверситетда химиядай тарсар гузвай. МГУ куьтягьай хва Олега Санкт-Петербургда кIвалахна, руш Тамара, вуз акьалтIарайдалай гуьгъуьниз гъуьлуьз фена, Москвада къецепатан чIаларин институтда кIвалахна.
Къейд авун лазим я, К.Гьасанован багърийрикай гзафбуру, адан рехъ давамаруналди, къайдаяр хуьдай органра кIвалахзава. Гьасанов Эмир Агъафендиевич гьабурукай сад я. Алай вахтунда ада РД-дин прокуратурада кIвалахзава.
Мукьвара Кебир Межидович дидедиз хьайидалай инихъ 105 йис тамам хьанва. Дагъустандин къенепатан крарин министерстводин къуллугъчийри и камаллу кас рикIелай алудзавач. Гьар йисан 9-Майдиз, къенепатан крарин органрин сувар тир 10-ноябрдиз МВД-дин делегацияди Махачкъалада Ленинан Комсомолдин тIварунихъ галай ял ядай багъда кучукнавай Кебир Гьасанован сурал цуьквер эцигзава.
И викIегь лезги хциз гьуьрмет авунин, ам рикIел хуьнин лишан яз, адан тIвар Махачкъаладин Кяхуляй поселокдин са куьчедиз ганва.
Чаз республикадин къенепатан крарин органрин алай вахтунин ва къвезвай регьберар ва къуллугъчиярни Кебир Межидович Гьасанов хьтин экуь гел тадайбур хьана кIанзава.
Агьадуллагь Женетов,
РД-дин ОВД-дин ветеранрин Советдин председателдин заместитель, къенепатан къуллугъдин отставкада авай полковник
