И йикъара Ахцегь районда РСФСР-дин халкьдин артист Р.Гьажиевадин тIварунихъ галай, районрин арада тешкилзавай “Жегьил пианист” IV конкурсда Дербентдин, Мамедкъаладин, Дербент, Кьурагь, Докъузпара ва Рутул районрин музшколайра кIелзавай гадайрини рушари чпин устадвал къалурна. Багьа мугьманрин арада Ахцегь райондин кьилин везифаяр тамамарзавай Р.Гьамзаев ва райондин депутатрин собранидин председатель А.-К. Палчаевни авай.
Р.Гьамзаева, кIватI хьанвайбурухъ элкъвена, чими келимаяр лугьунихъ галаз сад хьиз, районрин арада и конкурс кьиле тухузвайди сад лагьай сефер туширди, ам просвещенидин “Люминари” центрада тешкилун адет хьанвайди къейдна. Ада конкурсдин иштиракчийрихъ агалкьунар, яратмишунрин рекье хъсан идеяяр ва гележегда пешекарвилин кIвалахда абур кьилиз акъуддай алакьунар хьун алхишна.
— Мумкинвиликай менфят къачуналди, за мергьяматлувилин “Просвещение” фондунин президент Магьмуд Абдулжелиловичаз медениятдин хилен и мярекат кьиле тухудай майдан гунай, чIугвазвай зегьметдай ва жегьилрин яратмишунрин теклифрин тереф хуьниз гьазурвиляй рикIин сидкьидай чухсагъул лугьузва, — алава хъувуна ада.
Районрин арада кьиле тухузвай конкурсдин жюридин член, РФ-дин искусствойрин лайихлу деятель Хан Баширова райондин кьиле авай ксариз ва и конкурсдин тешкиллувилин комитетдиз, гьакIни муниципалитетдин медениятдин ва образованидин месэлайрив пешекарвилелди эгечIунай чими келимаяр лагьана.
Мярекатдин нетижайриз килигна, конкурсда гъалиб хьайибуруз ва приздин чкаяр кьурбуруз кубокар, дипломар, вири иштиракчийриз къиметлу пишкешар гана.
Чи мухбир
