РД-дин экономикадин ва мулкар виликди тухунин министр Гьажи Султанов республикадин “Дагъустандин правда” газетдин майдандал журналистрихъ галаз гуьруьшмиш хьана. Мярекат региондин экономикдин хилен 2022-йисан нетижайриз ва 2023-йис патал вилик эцигнавай месэлайриз талукь тир.
Министрдин гафаралди, 2022-йисуз Дагъустанда экономикадин хел гьатта садрани тахьай хьтин йигинвилелди виликди фенва, гьакIни яшайишдинни экономикадин жигьетдай хъсан нетижайрив агакьнава.
“Дагъустанда гегьенш майданра аваз кьилиз акъудзавай инвестицийрин проектар уьмуьрдиз кечирмишна. Абуру кIвалахдин цIийи чкаяр арадал гъидай, республикадин бюджетдиз алава такьатар желбдай мумкинвал гана. Идалайни гъейри, алай йисуз производстводин чIехи са жерге объектар кардик кутаз алакьнава. Абуру республикадин экономикада хъсан патахъ дегишвилер тваз куьмекда”, — къейдна идарадин кьили.
Экономикадин ва мулкар виликди тухунин министрди гьакIни къейд авурвал, 2022-йисуз региондин агьалийрин дуланажагъдин дережа хкаж хьанва. Кьилди къачуртIа, госкъуллугъчийрин ва социальный работникрин мажибар хкажна, гьакIни яшайишдин рекьяй алава тир пособияр ганва.
“Кьилди къачуртIа, регионди, сиягьатчивилин цIийи маршрутар кардик кутаз ва мугьманриз республикадин культурадин рекьяй девлетлу тежриба теклифиз, туризмдин хиле еке камар къачунва. И хел къвердавай гегьенш жедайвал я. Туризм виликди тухуни и хилехъ галаз алакъалу маса къурулушризни хъсан патахъай таъсирда. ГьакIни чна промышленность, иллаки хуьруьн майишат виликди тухун патал хейлин кIвалахар кьиле тухванва. Санлай къачурла, вири и серенжемри Дагъустандин экономика еримлу хьуниз куьмекзава”, — къейдна Гьажи Султанова.
2022-йисуз республикади региондин 52 проектдик кутунвай серенжемарни кваз милли 13 проект кьилиз акъудунин карда иштиракна. Гьа са вахтунда кьиле тухузвай вири кIвалахар тамамдаказ икьраррин бинедаллаз кьиле тухванва, харжнавай такьатри чара авунвай финансрин санлай къачур кьадардин 91 процент тешкилна. Санлай къачурла, алатай йисуз РД-дин 44 госпрограмма уьмуьрдиз кечирмишунин кIвалахар кьиле тухвана.
Министрди хабар гайивал, экономикадин бинелу жуьрейрай акъудзавай метягьрин ва къуллугърин индекс 2,2% хкаж хьанва.
“Виридалайни йигинвилелди промышленностдин хел вилик фенва. 2022-йисуз промышленный производстводин индекс 108,5% барабар хьана. Хсуси производстводин метягьдин ва тамамарнавай къуллугърин кьадарди, санлай къачурла, 72,7 миллиард манат тешкилна. И хиле агалкьунар хьун Гособоронзаказдин гьисабдай (2022-йисуз ам 6 миллиард манатдиз барабар тир) таъминариз хьанва.
Алай йисан планрикай рахадайла, Гь.Султанова хабар гайивал, Дагъустанди 2023-йисуз 220-далай гзаф яшайишдин объектар кардик кутада.
“Объектар эцигунин кIвалах региондин инвестицийрин программадин сергьятра аваз кьиле тухуда. Абурун арада мектебриз фидалди тир образованидин идараярни, школаярни ава. Санлай къачурла, инвестпрограммаяр финансралди таъминарун патал Дагъустанда 20 миллиард манат фикирда кьунва, идакай 9 миллиард федеральный бюджетдай тир такьатар я”, — лагьана РД-дин экономикадин ва мулкар виликди тухунин министрди.
Чи мухбир
