Халкьдин алатрин оркестрдин — 45 йис
И мукьвара Къадим Дербент шегьердин музучилищедин актовый залда инин халкьдин алатрин оркестрдин 45 йис тамам хьунин юбилейдиз талукьарнавай концерт кьиле фена. Оркестрдин руководитель, РД-дин искусствойрин лайихлу деятель, композитор, дирижер Насир Бабаевич Шагьмурадов я.
Шад мярекатда РД-дин халкьдин артист, Дагъустандин халкьдин алатрин оркестрдин дирижер Новруз Шагьбазова, РД-дин халкьдин артист Хан Баширова, РД-дин искусствойрин лайихлу деятель Мавлудин Хийирова, РД-дин культурадин лайихлу работник Бахтияр Хандадашева, шегьердин культурадин, жегьилрин сиясатдин ва спортдин управленидин начальник Самиля Нажафовади, Лезги театрдин директор Динара Эминовади, шегьердин ветеранрин советдин председатель Гьажимурад Гьажимурадова, музучилищедин директор Камиля Магьмудовади, и цIарарин авторди, Насир муаллимдин ученикри, музыкадин ва искусствойрин школайрин директорри, студентри ва масабуру иштиракна.
Н.Шагьмурадов 1953-йисуз Докъузпара райондин Миграгъ-Къазмайрин хуьре дидедиз хьана. Адан аял вахтар Баку шегьерда акъатна. Юкьван школа куьтягьай 1969-йисуз ам Махачкъаладин культпросветучилищедин хор патал дирижерар гьазурдай отделенидиз гьахьна. Училище чешнелудаказ акьалтIарна, рикIе кьилин образование къачунин къаст авай ам 1972-йисуз Москвадиз фена, культурадин искусстводин госинститутдин оркестррин дирижёррин факультетдик экечIна. Халкьдин алатрин рекьяй кьилин образование авай жегьил пешекар 1976-йисуз Дербентдин музучилищедиз ракъурзава. КIвалахдив эгечIай кьве вацралай адаз армиядин жергейриз эверзава. Са йисуз къуллугъна хтай ам, мад вичин рикI алай кIвалахдив эхгечIна.
Алай вахтунда оркестрдихъ репертуарда Насир муаллимди арадал гъанвай зурба ирс ава. Училищедин образованидин программади истемишзавайвал, студентрин чирвилер гегьеншарунин мураддалди ада, халкьдин музыкадилай гъейри, оркестрдин программадик урус халкьдин, классикадин ва къецепатан уьлквейрин алатрин авазарни кутуна. Н.Шагьмурадова, халкьдин алатрин оркестрдилай гъейри, эхиримжи йисара училищедин директордин тIалабуналди урус халкьдин алатрин оркестрни тешкилнава.
Халкьдин алатрин оркестр Дербент шегьерда, Дагъустанда кьиле фейи жуьреба-жуьре конкурсрин ва фестивалрин гъалибчи, Кеферпатан Кавказдин музыкадин училищейрин халкьдин алатрин оркестррин арада кьиле фейи конкурсдин дипломант, Дагъустандин телевидениди тухвай “Чна бажарагълубур жагъурзава” конкурсдин лауреат я.
Насир муаллимди акьалтзавай несилдиз халкьдин алатар кIанариз, абур пропаганда ийиз, ягъиз вердишариз, алатрин сирер чириз, халкьдин музыка хуьз ва раиж ийиз, бегьерлудаказ кIвалахиз ингье 47 йис хьанва. И концертни Насир муаллимдин зегьметдин зурбавилин ва яратмишунрин агалкьунрин лишан я. Са сятни зура давам хьайи концертдин программадик лезги, азербайжан ва грек халкьарин авазар, композиторар тир П.Киберован, Н.Шагьмурадован, А.Бабаеван, Т.Къулиеван, Ж.Бизедин, А.Новикован, гьакI лезги халкьдин манияр квай. Наиля ва Мадина Шагьмурадовайри, Айгуьн Нажафовади, Людмила Айрапетяна, Нажмудин Шагьбанова, оркестрдихъ галаз манияр лугьузвай “Элегия” ансамблди устаддиз тамамарай манияр, балабандай Самур Эмирбегова ягъай халкьдин аваз тамашачийри пара хушдиз кьабулна. Концерт маэстроди кхьенвай “Лезгинка” макьамдалди акьалтIарна.
Н.Шагьбазова, Х.Баширова, М.Хийирова, С.Нажафовади, халкьдин манийрал рикI алай Гь.Гьажимурадова ва масабуру чпин рахунра кIелдай вахтар рикIел хкана, оркестрдин коллективдин кIвалахдиз, Насир муаллимдин зегьметдиз еке къимет гана. Училищедин директордин ва ветеранрин советдин патай Н.Шагьмурадов ва оркестрдин солистар шабагьриз лайихлу хьана.
Эхирдай Камиля Магьмудовади ва Насир Шагьмурадова мярекатда иштиракай виридаз сагърай лагьана.
Къагьриман Ибрагьимов
