—        Иви кьери, дамарар михьи авун патал, 2 лимон, 2 апельсин цилер хкудна як регъведай машиндай авадарна, хуьрекдин 2-3 тIуруна авай вирт алава хъувуна, къа­риш­ма холодильникда хуьда. Ахпа ичIи ри­кIе­лай хуьрекдин са тIуру­на  авайди са стаканда авай чими цихъ галаз хъвада. Сагъарунин вахт 3 варз.

—        Пустырникди ивидин давление агъузарда, кьилин тIал секинарда, ахвар гъида, рикIин кIвалах хъсанарда. Чайдин кьве тIу­руна авай пустырникдин хъчарал са стаканда авай къайи яд илична 8 сятда тада. Ахпа ам куьзна са йикъан вахтунда хъвада.

—        Туьтвер тIазвайла, са стаканда авай кудай циз 1/2 чайдин тIуруна авай кьел ва гьа­кьван куркума вегьена, йикъа 4-5 сеферда туьтвера экъуьрда.

—        Шекердин азар авайла, 5-15 г кушдин тумунал 250 г ругунвай къайи яд илична 2-3 сятда тада. Ахпа а къаришма ксудалди вилик хъвада.

—        Ивидин давление агъуз аватнавайла, 50 г ифирнавай кофедин тварар регъвена, адал 250 г  вирт ва са лимондин шире алава хъувуна холодильникда хуьда. Фу тIуьрда­лай гуьгъуьниз 2 сятдилай чайдин са тIуруна авайди ишлемишда.

—        Кьил элкъвезвайла, хуьрекдин са тIуруна авай куьлуь авунвай облепихадин (вакIан кIирияр)  пешерал са стакан ргазвай яд илична, зур сятда тада. Ахпа ам куьзна вири са сеферда хъвада.

—        КIвачин дамарар чIур хьанвайла (варикоз) памбагдин гуьлуьтар зур сятда кьелен це (чайдин 2 тIуруна авай кьел са стакан чими циз вегьена цIурурда) кьежирна, кьурур хъувуна, кIвачел алукIда. Абур алаз йифиз ксайтIани жеда. И серенжем кIвачериз регьят жедалди ийида.

—        ПIапIрусдикай инсандин бедендиз гьикьван зиян аватIа чизватIани, гзафбурувай ам гадариз жезвач. ПIапIрусди рикIин азарар арадал гъизва. Ам чIугун гадарайлани рикIин азарар акатунин хаталувал 15 йисуз кьван давам жезва.

—        Жигерар никотиндикай михьи авун патал, гьар юкъуз цIийиз гьазурнавай газаррин миже ишлемишун хийирлу я.

—        РикIин кIвалах къайдадикай хкатнавайла, хвоядин таза пешерал ва нарат тарцин чкалрал (гьар сад хуьрекдин 5 тIуруна авайди) са литр ргазвай яд илична, 15 декьи­кьада ругуна, термосдиз цана экуьналди тада. Ахпа ам куьзна, йикъа 3-4 сеферда 2/3 стаканда авайди ишлемишда.

—        Дарчинри куьк инсанриз яхун хьуниз куьмек гуда. Англиядин диетологри дарчинар вирибуруз ишлемишун меслят къалурзава. Ада ивидик квай холестериндин ва ­шекердин кьадар тIимиларзава. Дарчинар чайдиз, кофедиз ва хапIайриз вегьена ишлемишда.

—        Лимон, апельсин, мандарин, грейпфрукт инсандин бедендиз гзаф хийир авай, витамин С гзаф квай, имунный система хъсанарзавай майваяр я. Абур чеб сагълам хьана кIанзавай гьар са касдин суфрадал хьун лазим я. ГьакIни гьар экуьнахъ  чими цихъ ва я са кIус лимондихъ галаз са тIуруна авай вирт ишлемишунни хийирлу я.

—        Нервияр къайдадикай хкатнавайла, хуьрекдин са тIуруна авай куьлуь авунвай салатдин таза пешерал са стакан ргазвай яд илична 20 декьикьада тада. Ахпа, ам къайила, куьзна, са гьафтеда йикъа пуд сеферда 1/2 стаканда авайди ишлемишда. Ихьтин гьалима йифиз ахвар текъвезвайлани 1/3 стаканда авайди кусудалди вилик ишлемишун хийирлу я.

—        Кьиле ван авайла, экуьнахъ ичIи ри­кIелай хуьрекдин 2 тIуруна авай гьажибугъдайрин чIем са стаканда авай минеральный чими цихъ галаз хъвада. Сифте кьилерай са тIимил сивихъ къведайди хьиз жеда, ахпа ам алатда. Сагъарунин вахт са варз я. Вири пуд курс кьиле тухун лазим я.

Гьазурайди — Надият Велиева