Духтур. Им гьар са инсанди вичин уьмуьр ихтибарзавай кас я. Мединститут кIелна куьтягьзавай гьар са студентди вичин пешекарвилин везифаяр намуслудаказ, къуватарни гьайиф татана, кьилиз акъудда лагьана, Гиппократан кьин кьазва. Гьайиф хьи, ихьтин кьин кьур гьар садакай халисан духтур жезвач. Амма чпин пешедал рикI алай, инсанрин сагъламвал сифте чкадал эцигнавай, чара касдин гьалдикай хабар кьадай ва маса хъсан ерияр хас тир пешекарарни авачиз туш.

Вири хилера хьиз, медицинадани лайихлу гел тунвай ксар къурушвийрин арада тIимил авач. Чпин тIварар неинки республикада, гьакIни къецепатани кваз машгьур хьанвай Микьдад Жамалович Везирован, Решид Сейфиевич Гьажиеван, Нариман Салманович Рамазанован ва маса­бурун баркаллу рехъ къе духтурар тир Те­мирлан Эфендиева, Сабир Закирова, Руслан Назаралиева, Расим Рамазанова, Ис­маил Вердиханова… давамарзава. Гьелбетда, гьам медицинадин агъсакъалрин арадай, гьамни абурун кар давамарзавай духтуррин къифледай баркаллу къурушвийрин тIварар чавай мадни кьаз жеда.

Къенин макъала духтурвилин пешедалди вичин тIварцIел халкьдин патай бар­калла гъанвай лайихлу къурушвийрикай сад тир  Рафик  Максимович  Адигуьзеловакай  я.

Бубайрин мисалди лугьудайвал, “Яц квахьайди квахьна, са чIал чидайдал гьалт­рай”. Начагъ хьанвай касни кар чидай духтурдал гьалтун еке бахт я. Гьа ихьтин духтуррикай сад тир Рафик Максимовичакай  кимерал, хуьре-кIвале, начагъвилерикай ихтилат кватай чкайрал хуьруьнвийри лугьуда: “Аллагь куьмек хьурай Рафик духтурдиз, югъ-йиф талгьа­на, мус куьмек герек атайтIани, а кас, “Та­ди куьмек” хьиз, инсанрин къуллугъда акъвазнава…”

Гьавиляй чIехи хуьре адаз гьуьрмет-хатур тийизвай, адакай къана рахай са касни зал гьалтнач. Им Р. Адигуьзелован гьам пешекарвилин, гьамни инсанвилин ерийрикай хабар гузвай делил я. Ада а гьуьрметни авторитет неинки са хуьре, гьакI адалай къецени къазанмишнава… И кардикай Интернетдин чинра Рафик духтурдин тIварцIихъ кхьенвай чухса­гъул­дин гафарини шагьидвалзава.

Р.М. Адигуьзелов 1962-йисан 1-январдиз Хасавюрт райондин Къурушрин хуьре фяледин хизанда дидедиз хьана. 1980-йисуз хуьруьн 2-нумрадин юкьван школа къизилдин медалдалди акьалтIарна, ам армиядин жергейриз къуллугъиз фена. Ватанди хиве тунвай буржи тамамарна хтай Рафик Дагъустандин мединститутдик экечIна. Инани ам лап хъсан кIелзавай студентрин жергейра хьана. 1988-йисуз ин­ститут акьалтIарай жегьилди вичин кIва­­­­лахдин рехъ ЧIехи Новгород шегьердин больницада зегьмет чIугунилай башламишна. Ина хъсан духтуррин гъилик тежриба къачуна, кьве йисалай ам вичин хайи ватандиз — Дагъустандиз — хтана.

Гьа икI, Дагъустандин здравоохра­ненидин министерстводин приказдин ­бинедаллаз, Бабаюрт райондин ЦБ-дин кьилин духтурдин тIалабуналди, Рафик Максимович гьа и райондин центральный больницадиз акушер-гинеколог яз рекье туна. Ана ада вичин чирвилерни тежриба къалурна, са гъвечIи муьгьлетда Рафик духтурди вич халисан пешекар тирди ­алакьунралди субутна. Коллективдин арада ада еке авторитетни гьуьрмет къазанмишна.

1994-йисуз Р.Адигуьзелов Бабаюрт райондин центральный больницадин дидевални аялар хуьнин рекьяй кьилин духтурдин заместителвиле тайинарна. Ада къенин йикъалди вичин хиве авай и везифа намуслудаказ кьилиз акъудзава.

Рафик духтурдин пешекарвилин, алакьунрин гьакъиндай Россиядин Федерациядин здравоохраненидин министрдин къул алай Чухсагъулдин чарчи, Дагъустандин здравоохраненидин министерстводин патай ганвай гьуьрметдин грамотайри ва маса наградайри шагьидвалзава. Рафик Максимович 2017-йисуз вичин ла­йихлувилерайни алакьунрай “Гиппократ” ордендиз лайихлу хьана, им, гьелбетда, медицинадин хиле ада къазанмишнавай еке агалкьун я.

Инал мадни са кардикай лугьун кутугнава: Рафик Максимовича духтуррин хизан арадал гъанва. Уьмуьрдин юлдаш Марина  Бейбалаевнадини  Рафик Максимовича — халкьдин сагъламвилин къуллугъда акъваздай ниятри, мурадри, уьмуьрдин са геле тунвай жегьилри — кьисметар сад авур йикъалай къенин йикъалди, къуьн-къуьне аваз, и баркаллу рекье гьакъисагъвилелди зегьмет чIугвазва.

Маринадини Рафика санал институт куьтягьна, санал ЧIехи Новгород шегьерда, Бабаюрт райондин центральный больницада кIвалахна. 1995-йисуз Марина Бейбалаевна Къурушрин участковый больницадиз хтана, кьилин дережадин категория авай акушер-гинеколог яз кIвалахзава. Ам хуьре-кIвале гьуьрмет авай, чарадан гьарайдиз гьай лугьудай, кIевевайдаз гъил яргъи ийидай духтур я. Гьар са пешекарди гьуьрметни авторитет вичин алакьунралди, инсанвилин ерийралди къазанмишзавайдал са шакни алач. Марина духтурни гьахьтинбурукай сад я.

Рафик Максимовичани Марина Бейбалаевнади кьве рушни са гада уьмуьрдин шегьредал акъуднава, абур ватандиз, ди­де-бубадиз вафалубур яз тербияламишнава. ЧIехи руш Тамаради хуьруьн 2-нумрадин юкьван школа гимишдин медалдалди, 2006-йисуз ДГУ-дин къецепатан чIа­ларин факультет яру дипломдалди, гьа са вахтунда заочнидаказ Москвадин “Синергия” университетдин “Бухучет ва ау­дит” факультетни куьтягьна. Ам алай вахтунда вичин хизанни галаз Москвада яшамиш жезва, финансист — экономист яз кIва­лахзава.

Мадинадини юкьван школа гимишдин медалдалди куьтягьна, Астрахандин госмединститут акьалтIарна, Москвада “Гастроэнтерология” пешедай клинический ординатурада кIелзава. Хва Шамилани, ди­де-бубадилай чешне къачуна, Астрахандин госмедуниверситетда, лечебный факультетда кIелзава. Ам 6-курсунин студент я.

Гьар са диде-бубадин мурад вафалу веледар хьун, гьар са веледдин мурад-метлебни чпин диде-бубадин рикIер ­баркаллу краралди шадарун я. И макъаладин кьилин игитарни гьахьтин баркаллубурун жергейрай я. Мад са кар къейд тавуна жедач: Рафик Максимовичани ­Марина Бейбалаевнади инсанрин сагъламвал хуьнин рекье къуллугъиз 30 йис хьанва.

Чи эрзиман мурад Адигуьзеловрин чешнелу хизандихъ гьам кIвалахдин, гьамни уьмуьрдин рекье еке агалкьунар хьун я.

Гьажи Къазиев