Алатай гьафтедин ял ядай йикъара Дагъустандин здравоохраненидин министр Жамалудин Гьажиибрагьимов Республикадин перинатальный центрадин ва Республикадин аялрин клинический больницадин кIвалахдихъ галаз таниш хьана.
Вичин заместитель Салман Агьмедовахъ галаз санал ведомстводин кьил медицинадин идарайра къекъвена, палатайриз ва отделенийриз килигна, аялар хадай блокда, реанимацийра авай гьалар ахтармишна. Азарлуйрихъ ва медперсоналдихъ галаз рахана. Перинатальный центрада гьавадин чимивал къайдадик кутадай система гуьнгуьна тунин чарасузвал авайди, гьакIни гьаят къацу авунин ва аваданламишунин кIвалахар кьиле тухвана кIанзавайди лагьана.
Республикадин аялрин больницадихъ са бязи тадаракар цIийи хъувунин игьтияж ава. Медицинадин идаради “2018-2020- йисара аялрин поликлиникайрин ва медицинадин идарайрин поликлиникайрин отделенийрин материально-технический база вилик тухунин” макьсаддин программадин сергьятда аваз федеральный такьатрин гьисабдай рентгендин цIийи аппаратар маса къачуник умуд кутазва.
КIвалах тешкилнавай жуьредин са бязи месэлайрин гьакъиндай министрди ви-чин фикир лагьана. Азарлуйрилай дарманралди таъминарунин ва медицинадин куьмекдин еридин гьакъиндай арзаяр авач.
1980-йисалай эцигзавай больницадин кьве корпусдиз килигна. Ина диагностикадин отделение, хирургический азарлуяр ва таза аялар патал реанимациядин отделенияр кардик кутун планламишнавай. Амма 37 йис я объект яргъал йисара эцигзавайбурун жергеда гьатна.
Адалай гъейри, ДРКБ-дин патарив эцигунар кьиле тухуни къалабулух кутазва. И карди объект терроризмдин жигьетдай хаталувилик кутазва. Са бязи хсуси кIвалерин варар больницадин гьаятдиз гьахьдай жуьреда кутунва.
Таниш хьайидалай гуьгъуьниз Жамалудин Гьажиибрагьимова са жерге тапшуругъар гана, абур тамамарун вичин гуьзчивилик кутунва.
Чи мухбир
