Гад тамамвилелди вичин ихтиярда гьатнава, ида хуьруьн майишатдин карханайрин, лежбервилинни фермервилин майишатрин, арендаторрин къайгъуярни артухарнава.
— Уьзуьмлухрани багълара, саларани производстводин амай хилера агротехникадин серенжемар кьиле тухунихъ галаз санал, карханайрин, КФХ-рин ва агьалийрин вилик и йикъара мал-къара патал алафар гьазурунин везифани акъвазнава, — лугьузва Сулейман-Стальский райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова. — Санлай къачурла, алай йисуз районда 27 агъзур тонндилай тIимил тушиз векъи алаф гьазурун планламишнава. И кардал вири къуватар желбнава.
Чаз малум хьайивал, ДаркIуш-Къазмайрин, Эминхуьруьн, ЦIийи Макьарин, Герейханован, КIварчагърин, Агъа СтIалрин хуьрерин поселенийрин территорийра КФХ-ри, арендаторри ва агьалийри векьер яна акьалтIарнава, абур туькера кьунва, чкайрал хканва.
Карханайрани лежбервилин майишатра векьер тракторрихъ галай косилкайралди, агьалийри гъилин дергесралди язава. Туькер кьадай пресс-подборщикарни районда бес кьадар авазва.
Алафар гьазурунин карда тафаватлувал къалурзавай лежбервилинни фермервилин майишатарни районда тIимил авач. ИкI, “Манатилов М.М.” КФХ-ди цIинин йисуз векьин 6000 туьк гьазурун лазим я. Куьруь са вахтунда ина 1600-далай виниз туькер кьунва.
7 гектар люцерна векьин уьруьшрай кьвед лагьай сефердани векьер яда, гьакIни ина кфетлу алаф ва 50 тонн емдин техил гьазурда.
“Гьайвазов Р.М.” КФХ-дихъ вилик йисара цанвай 35 гектар люцерна векьин уьруьшар ава, анрай векьер янава, 4000-далай виниз туькер кьунва, и кIвалах давамни жезва.
Санлай къачурла, КФХ-ди алай йисуз мал-къара патал 5000-далай виниз векьин туькер ва 2000-далай виниз самун туькер гьазурда.
Икьван чIавалди районда карханайри, КФХ-ри ва агьалийри 15000 тонндив агакьна векъи алаф гьазурнава.
Райондин хуьруьн майишатдин карханайра, лежбервилинни фермервилин майишатра ва агьалийрин участокра алафар гьазурунин кIвалахар хъсан тешкиллувал ва йигин еришар аваз давам жезва.
Чи мухбир
