КIелунин, низамдин, цIийивилер кардик кутунин ва гзаф маса рекьерай Цмуррин умуми образованидин школа неинки чи районда, Дагъустан Республикада, гьакI адалай къецени хъсанбурукай сад я.  Сиф­те­ кьил кутур гзаф крарни и школадихъ га­лаз алакъалу я.

И йикъара школада Россиядин аялрин ва жегьилрин “Сифтебурун гьерекат” (“Движение первых”) гьерекатдин сифтегьан организация ачухуниз талукьарнавай шадвилин мярекат кьиле фена. Ам государстводин пайдах хкажунилай ва Россиядин Федерациядин Гимн тамамарунилай башламиш хьана.

Мярекатдал сифте гаф школадин дирек­тор­ Сергей Ежов рахана. Ада къейдна хьи, “Сифте­бурун гьерекат” Россиядин аялрин ва жегьилрин гьерекатдин сифтегьан организация хьун — им школьникриз гзаф хилерай цIийи мумкинви­лер ачухун, вири Россияда дустар жагъуриз, гьакI­ни гележегдин пешедин патахъай тайин хьун я.

— Чи школа кIелунин инновациядин къайдаяр ва аялрин сифте кьил кутунар уьмуьрдиз кечирмишунин рекьерай  кIвен­кIве хьайиди я, — давамарна С.Ежо­ва. — Зун кIе­велай инанмиш я хьи, школьникрикай гьар садавай вич вилик тухудай мумкинвилер жагъу­риз же­да. Гьамиша са мураддихъ элкъвенваз хьухь!

Школьникриз Россиядин аялрин ва же­гьил­рин гьерекатдин сифтегьан организация ачухун тербиядин рекьяй школадин директордин заместитель Заира Развановнадини мубаракна.

Алхишдин гзаф келимаяр Цмуррин шко­ла­дин кIелзавайбуруз муаллимри, насигьатчийри ва мярекатдин мугьманрини лагьана. ИкI, РУО-дин патав гвай ИМЦ-дин кьилин пешекар, гуьгьуьллубурун гьерекат вилик туху­нин центрадин руководитель Маина Аликберовади, райондин жегьилрин парламентдин председатель Фарид Девлетханова, муниципалитетдин школайрин вожатыйри чеб тарихдин метлеб авай ихьтин мярекатдин иштиракчияр хьунал гзаф шад тирди къейдна.

Россиядин аялрин ва жегьилрин “Сифтебурун гьерекат” 2022-йисан 18-декабрдиз уьлкведин руководстводи теклифуналди, акьалтзавай несилдиз тербия гунин, абуруз къулайвилер тешкилунин мураддалди арадал гъайиди я.

Хазран Кьасумов