СтIал Сулейманан районда Векьелрин хуьр кьегьал рухвайралди, вини дережадин пешекарралди Россияда, адалайни къецени  машгьур я. Вичин бубадин гел кьур Темирханов Темирхан  Гьасанович  1971-йисуз Векьелрин хуьре тIвар-ван авай муаллим Гьасанан хизанда дидедиз хьана. Муаллимдин хизанда 3 хвани 2 руш авай. Темирхан виридалайни гъвечIиди тир.

Дагъустанда залзала хьайила,  дагълух хуьрерихъ галаз санал Векьеларни дуьзендиз, Кьулан СтIалдал куьчарна. Темирхановрин хизандини ана кIвал-югъ кутуна. Темирхана Кьулан СтIалдал 3-класс акьалтIарай­ла, абурун хизанди хайи ерийрихъ ял хъувуна. Векьелрин чи­лерал кIвалер эхцигиз башламишна. Темирхана  1981-йисуз Сардархуьре — 4-класс, 1989-йисуз Алкьвадрал 10-класс куьтягьна. Гьа и йисуз ам Дагъустандин гос­университетдин физикадинни­ математикадин факультетдик экечI­на. Гьеле вузда кIел­замаз ада кIва­ла­хиз­ни башламишна. ДГУ акьалтIарай 1995-йисуз Темирхан кур­хуь­руьн­ви Гьуьсеналидин руш Саиматал эвленмиш хьана. Саиматни ДГУ-дин химбио­логия­дин факультетда кIелнавай муаллим тир­. Ада Темирханаз 2 гадани 1 руш багъиш­на­.

Темирхановрин хизандин чIехи паюни  бубадин пеше яз хьайи муаллимвилин рехъ хкяна. Абуру жемятдин арада еке гьуьрмет къазанмишнава. Темирханан чIехи  стха Агъарагьима­ни, кьулан стха Фатулагьани Дагъустан­дин политехнический институт акьал­тIарнава. Адан  стхайри, ваха, савадлу хизанар  арадал гъана, чпин пешейрай кIвалахзава, вири Ве­кьелрал яшамиш жезва. Темирхан Гьасановича 1991-йисалай инихъ  Сардархуьруьн 8 йисан, гуьгъуьнлай 11 йисан школада математикадай, информатикадай муаллимвиле кIвалахзава. Идалайни гъейри, 2007-йисалай кьулухъ са кьадар вахтунда ада и мектебда завучдин везифаярни тамамарна.

Темирханаз СтIал Сулейманан райондин образованидин управленидин, республикадин профсоюздин патай шумудни са грамота ава. Темирхан Гьасановичаз  2009-йисуз —  Россиядин Президентдин грант,  РФ-дин образованидин министерстводин грамота, 2016-йисуз РФ-дин общеобразованидин гьуьрметлу работник лагьай тIвар гана. 2023-йисуз Темирхан Темир­ха­нов  “Дагъустан Республикадин лайихлу муаллим” тIварцIин сагьиб хьанва.­  Темирхан Гьасановича чирвилер гайи цIудралди аялри важиблу къуллугърал  зегьмет чIугвазва, абурулай чухсагъулрин чарарни хквезва. Темирхановар, стхавал, гьуьрмет-хатур хвена,  Векьелрал яшамиш жезва.

Лайихлу веледар тербияламишай абурун диде Саимат Векьелрин хуьре гьуьрмет авай дишегьлийрикай сад я.

Вадим  Жамалдинов