Къенин девирда печатдин СМИ-рин такьатрихъ, гьа жергедай яз “Лезги газетдихъни” интернетдин майданра махсус сайтар, соцсетра чинар, кIватIалар ава. Ибурулайни гъейри, “Лезги газетдихъ” фадлай кардик квай ютуб-канални ава ва аниз мукьвал-мукьвал хабарар, менфятлу малуматар алава ийизва.
2022-йисан ноябрдин вацралай и каналда газетдин кьилин редактор Мегьамед Ибрагьимова кьиле тухузвай “Халкьдин кимел” передача кардик акатнава. Передачадин сергьятра аваз, вилик-кьилик квай ксарихъ, алимрихъ, писателрихъ, жавабдар къуллугъчийрихъ, карчийрихъ ва маса хилерин пешекаррихъ галаз важиблу, метлеблу месэлайрай ихтилатар кьиле тухузва, халкьдин месэлаяр къарагъарзава. Мисал яз, икьван чIавалди передачада иштиракайбурун жергеда филологиядин илимрин кандидат Саимат Юзбегова, РД-дин милли сиясатдин ва динрин крарин рекьяй министр Энрик Муслимов, алим, ДГПУ-дин профессор, А.Тахо-Годидин тIварцIихъ галай педагогикадин НИИ-дин педагогикадин сектордин заведующий Шайдабег Мирзоев ава. Къейд ийин, и проект карчияр тир Мурад Мегьамедкеримованни Васиф Гьасанован къаюмвилин куьмекдалди кьилиз акъудзава.
Чна ашкъи авай вирибуруз “Лезги газетдин” ютуб-каналдик экечIун, ана жезвай видеойриз, передачайриз килигун теклифзава. Канал жагъурун патал ютубда “Лезги газет” кхьин бес жеда.
«Лезги газет»
