Махачкъаладай — аэропортуниз
Дагъустандин транспортдинни рекьерин майишатдин министерстводин пресс-къуллугъди хабар гузвайвал, Махачкъаладай чкадин аэропортуниз цIийи маршрут кардик кутунва. Ам лап вини дережадин къулайвилералдини хатасузвилелди таъминарнава. Автобусдин ракIарихъ, набут инсанрин игьтияжар фикирда кьуна, абур хкаж жедай махсус тадаракни кутунва (откидная аппарель). Са улакьда 22 кас гьакьзава.
Махачкъаладай аэропортуниз физвай автобусар акъвазардай чка Имам Шамилан тIварунихъ галай проспектдин 78-нумрадин дараматдин вилик, “Этажи” тIвар алай алишверишдин центрадин къаншарда ава. Автобусдин гьерекатдин маршрут ихьтинди я: Каспийскдин цIийи рекьяй — аэропортунал кьван, арада акъвазардай чкаяр авачиз. Экуьнин сятдин 6-далай нянин сятдин 9-дал кьван (22:00) гьар 30 декьикьадилай автобусар рекьиз экъечIзава. Са кас тухунин къимет 100 манат я.
ГъвечIи заводар эцигда
“Дагъустандин экономика” телеграм-каналди хабар гузвайвал, Махачкъаладиз мукьва мулкарал, санлай къачурла, 1,5 млрд манатдин къимет авай гъвечIи заводар эцигда. Анра эцигунардай материалар, къир ва мебелар арадал гъида.
Чпихъ ихьтин фикирар авайдакай са шумуд карханади раижнава. Заводар “Долина новых идей и технологий (Тюбе)” тIвар алай индустриядин паркунин мулкунал эцигун пландик кутунва.
Кьилди къачуртIа, винидихъ ихтилат физвай проектар эцигунардай материалар (проектдин инициатор — группа компаний “РашМан”), ракьунни къиредин затIар арадал гъунихъ (ООО “Прайм”), мебелар (ООО “Массив-Про”), недай ширин шейэр гьазурунихъ (ООО “Юнион”), кIарасдикай затIар расунихъ (ООО “Дагестан-Кварц”), къирединни бетондин продукция арадал гъунихъ (ООО “Строй Арсенал”) галаз алакъалу я.
И проектар кьилиз акъудунин сергьятра аваз 317-дав агакьна кIвалахдай чкаяр арадал гъун пландик кутунва. Инвестицийрин кьадар 1,5 млрд манатдилай гзаф я.
Вилик тухун патал
“Дагъустандин экономика” телеграм-каналди, РД-дин экономикадинни мулкар вилик тухунин министерстводин пресс-къуллугъдал асаслу яз, хабар гузвайвал, 2023-йисуз республикадин дагълух мулкар вилик тухун патал 90 миллион манат пул ахъайда.
И такьатар чкадин карчийриз, хсуси майишатрин иесийриз куьмек яз чара ийида. Мисал яз, абурувай техника, теплицайриз герек тадаракар маса къачудайла ва багъ кутадайла авур харжийрин са пай эвез хъувун патал арзаяр кхьиз жеда.
Министерстводин пресс-къуллугъди къейдзавайвал, пулдин такьатралди ихьтин куьмекар гуни агьалияр дагълух чкайра карчивилел машгъул хьунал желбда, гьа са вахтунда анра кIвалахдай цIийи чкаяр арадал гъида. Нетижада дагъларай куьч жезвай инсанар элкъвена чпин бинейрал хтунални желб хъийида.
Зур миллиондилай гзаф
“Дагъустандин экономика” телеграм-каналди хабар гузвайвал, Махачкъаладин аэропортуни алай йисан 1-кварталда зур миллиондилай гзаф пассажирар кьабулнава. ИкI, 2023-йисан январдилай мартдал кьван абурун кьадар 204 289 касдиз барабар хьанва. Алатай йисав гекъигайла, им 14 процентдин гзаф я.
Къецепатан уьлквейрин рекъемар фикирда кьуртIа, Махачкъаладин аэропортунай и муддатда виридалайни гзаф агьалияр фенвай чкаяр Стамбул, Дубай ва Шарджа я. Урусатдикай рахайтIа, республикадин меркездай агьалияр самолетра аваз гзафни-гзаф Москвадиз, Санкт-Петербургдиз, Сургутдиз фенва.
Къайдадикай хкатунар галачиз хьанач
Дагъустандин энергетикадин ва тарифрин министр Марат Шихалиева къейд авурвал, ресурсар агакьарзавай компанийри виликамаз еке кIвалах кьиле тухванатIани, цIинин хъуьтIуьз ЖКХ-дин хиле кIвалах къайдадикай хкатай дуьшуьшар тахьана амукьнач.
Адан гафаралди, санлай къачурла, ремонт кьиле тухунин программаяр уьмуьрдиз кечирмишуни нетижаяр гузва. Амма (гьакI ятIани) и кьуьд татугай дуьшуьшар, къайдадикай хкатунар галайди хьана. И делилди ЖКХ-дин хиле дибдай дегишвилер тахьанвайдакай хабар гузва.
Вичин гафар тестикьарун патал министрди, мисал яз, алатай хъуьтIуьз республикадин энергетикадин объектрал мукьвал-мукьвал къайдадикай хкатай дуьшуьшар арадал атайди ва гьакIни са жерге агьалияр сихдаказ яшамиш жезвай мулкара тIебии газдин давление агъуз аватайди ва я тахьайтIа, газ вахтуналди атIай дуьшуьшар хьайиди рикIел хкана.
«Лезги газет»
