“Лезги газетдай” за “Гьамишалугъ рикIе­ра” ва “Цавар муьтIуьгъарайди” кьилер ганвай кьве макъала кIелна. Абуру заз лап таъсирна. ГьикI лагьайтIа, кьведни са темадай — ватанпересвиликай, тIвар-ван авай летчик Муртузалиевакай тир. Летчикар, вуж хьайи­тIа­ни, жуванбур заз пара кIанда. Мадни ла­гьайтIа, зи рагьметлу ими Урдиханни военный летчик тир. КIелай макъалайрин авторар Вадим Жамалдиновни журналист Нариман Ибрагьимов я. Чухсагъул кьведазни. Ги­ла — зи ими Урдиханакай.

Ам Нибидинни Умурейгьанан хизанда 1930-йисуз Курхуьрел дидедиз хьана. Адан са йис жедалди, буба, са шумуд йисалай ди­дени рагьметдиз фена. Урдихан ва адан вах Бесханум зи дах Жалавхана вичин патав хкана­.

Ватандин ЧIехи дяве башламиш хьа­на. 1942-йисуз Жалавхан, адан гуьгъуьналлаз гъвечIи стха Самурханни фронтдиз фена. КIвале дидедихъ галаз чун кьуд аял — зун, чIе­­­хи стха, Урдихан ва Бесханум амукьна. Гуь­гъуьнлай чир хьайивал, кIвалинни яшайиш­дин шартIар хъсанзавачир, къвердавай четинзавай  ва кIеве гьатзавай. Анжах колхоздай зегьметдин йикъарай гудай ризкьидал вил хьана кIанзавай. КIвалахзавайди са диде тир. И кардикай Агъа СтIалдаллай Салигьов Гьажимирзедиз хабар хьана (ам Урдихананн­и Бесхануман халу жезвай). Ада абур кьведни­ вичин патав  хутахна (адаз веледар авачир).

1943-йисуз Урдихан Кьасумхуьруьн  детдомдиз кьабулна. Пуд йисалай жегьил Каспийскдин ФЗО-дик экечIна, ана токарвилин, операторвилин пешеяр къачуна. Гуьгъуьнлай ремесленный училищеда кIелна. Кьасумхуьруьн почтуна телеграфист-радист яз кIвала­хиз, йифен мектебда кIелиз, юкьван образование къачуна. Адан рикIе офицер хьунин фи­кир авай. КIвалевай чIехибурухъ галаз мес­лят хьана, ам Харьковдиз фена, авиациядин училищедик экечIна. Вичин рикI алай чкада Урдихан  Набиева  лап хъсандиз кIелна, пешекарвилин кьилин чирвилер ва лейтенантвилин чин къачуна. Адахъ галаз ина хуьруьнви МутIалибани кIелна.

1956-йис тир. Лейтенант Урдихан Нибиевичакай военный частуна реактивный  самолетрин техник-механик хьана. Ада Одессадин военный округда авиациядин частара къуллугъна. Вичин жавабдар везифаяр хъсандиз тамамариз хьана. Инай чешнелу офицер ГДР-диз рекье туна. Ахпа 1976-йисуз, майорвилин чин аваз, Урдихан Нибиевич Закавказьедин военный округдиз хкана ва частунин командирдин заместителвиле тайинарна. Виринра ада, вичин везифаяр са рехнени квачиз тамамариз, вичелай чешне къалурна. КцIара ПВО-дин учебный центрада кIвалахна.

Уьмуьрдин юлдаш Нуриятани яргъал ре­кьеринни жуьреба-жуьре чкайрин татугайвилериз дурум гана. Ам медсестра тир. Мадни лагьайтIа, Урдихан Нибиевич Дагъустандин халкьдин шаир Сулейманан хва Мусаибан езне, Нурият Мусаибан руш тир. Ам амач, рагьмет хьурай вичиз.

1981-йисуз Урдихан Нибиевичаз подполковниквилин чин гана.  Ада Ватандиз 30 йисуз къуллугъна. Яргъал йисара Яракьлу Къуватра (сирлу тапшуругъарни кьилиз акъудай дуьшуьшарни хьана) намуслувилелди къуллугъ авунай У.Набиеваз чи ва маса уьлквейрин 11 медаль гана, са шумудра адаз командованиди чухсагъул малумарна.

1985-йисуз ам хизанни галаз Агъа СтIал-Къазмайрал  хтана. Нуриятани ада кьве хва — кьве кард чIехи авуна.

2006-йисан 30-мартдиз Урдихан Набиевич рагьметдиз фена. Рагьмет хьурай ими­диз.­

Райсудин Набиев