2023-йисан 1-майдилай агьалийрал пенсияр ва яшайишдин выплатаяр нагъд пулуналди анжах Россиядин Почтади агакьарда. Дегишвилерикай Россиядин Почтадин Дагъустан Республикадин УФПС-дин директор Руслан Алибегова суьгьбетзава.
— Квел бинеламиш яз Почтадикай гила агьалийрал пенсияр агакьардай тек са чешме хьанва?
— Пенсия нагъд пулуналди агакьардай кьетIен ихтияр Россиядин Почтадиз авайди 2023-йисан 18-мартдиз кьабулнавай “Почтадин алакъадин гьакъиндай” ва “Россиядин Федерациядин кьилдин законодательный актара дегишвилер тунин гьакъиндай” 76-нумрадин ФЗ-ди гузва. Почтади Россиядин Федерациядин вири мулкара алакъадалди таъминарзава, агьалияр яшамиш жезвай и ва я маса чкадиз финин четинвилиз ва анра яшамиш жезвай инсанрин кьадардиз килиг тавуна, почтадин къуллугъар кьилиз акъудзава.
— Икьван гагьда пенсия альтернативный (яни мумкин тир кьведакай сад хкяна) организацийрай къачузвай ксар патал вуч дегиш жеда?
— Ахьтин организацийрин къуллугъчийри виликдай пенсия кIвализ хкизвай агьалияр патал са дегишвални жедач. Абуруз икьван гагьда хкизвай юкъуз пенсия кIвализ агакьарда. Пенсия вахкузвай организациядин кассадай ам вахчузвай ксар гила почтадин отделенидиз фин лазим къведа. Идалайни гъейри, яшайишдин маса пулар (выплаты) къачузвай ксар патал генани къулай шартIар тешкилда: почтальонри вири пулар са юкъуз агакьарда. Эгер инсан кIвале авачиз хьайитIа, адан пул маса юкъуз кIвализ хкида ва я адавай, почтадин отделенидиз фена, ам вахчуз жеда. Эгер пенсионердин паталай ихтибарлу касди пул вахчузватIа ва ана пенсия вахкузвай тайин организациядин тIвар къалурнаватIа, ахьтин документ цIийиди къачун лазим я.
— Пенсия Почтади вахкунин къулайвал квекай ибарат я?
— Почтадин отделенида ва я кIвале пенсия, гьакI яшайишдин маса пуларни вахчузвай ксаривай алава къуллугърикайни менфят къачуз жеда: ЖКУ-дин счетрай пулар, ГИБДД-дин жермеяр, налогар (ва икI мад), квартирадин ва я дачадин, ОСАГО-дай страховка гуз, лотереядин билетар маса къачуз ва я газетарни журналар кхьиз жеда. ГьакI почтальонри кIвале виридалайни герек къвезвай товарар ва недай затIарни агакьарзава. И кар яшлу ва сагъламвилин мумкинвилер сергьятламиш хьанвай ксар патал иллаки важиблу я.
Почтади пенсия къачузвай касдиз, гьатта ам лап яргъа авай хуьре яшамиш жез хьайитIани, вахтунда ам вахкунин заминвал гузва. Иник гьатта кьетIен гьалар арадал атайтIани, пенсия вахтунда агакьарун акатзава. ТIебиатдин бедбахтвилер арадал атун мумкин тир регионра кIвалахдай схемаяр чахъ фадлай ава.
«Лезги газет»
