8-апрелдиз Махачкъалада, Иса пайгъамбардин тIварунихъ галай руьгьдин центрада, “Лезги халкьдин ифтар” лишандик кваз сивер хуьзвай рамазандин вацраз талукьарнавай мярекат кьиле фена.

Дагъустандин Муфтиятди тешкилнавай и межлисда сиясатдинни жемиятдин, илимдинни медениятдин векилри, спортсменри, республикадин шегьеррайни районрай атанвай ватанэгьлийри иштиракна. Санлай къачурла, абурун кьадар 18 агъзурдав агакьнавай. Гьуьрметлу мугьманрин арада РД-дин милли сиясатдин ва динрин крарин рекьяй­ министр Энрик Муслимов, Мегьарамдхуьруьн райондин кьил Фарид Агьмедов, Докъуз­пара райондин кьил Мегьамед Шамилов, Ах­цегь райондин кьилин везифаяр вахтуналди тамамарзавай Роберт Гьамзаев, Каспийск ше­гьердин депутатрин собранидин пред­седа­тель Абдулвагьид Жаватов, РД-дин Халкь­дин Собранидин комитетдин председатель Фирудин Ражабов, депутат Марат Алияров ва масабур авай.

Мярекатдин сергьятра аваз рахайбуру ихьтин межлисрихъ халкь сад авунин жигьет­дай авай важиблувал ва рамазандин варз мусурманар патал гьикьван кьетIенди ятIа къейдна.

Иштиракчийрин арада умрадиз фин патал вад путевкани “Лада Гран­та” маркадин машин къугъвана.

Къейд ийин хьи, тешкилатчийри мярекатдиз икьван гзаф инсанар къведа лагьана фикирнавачир. И кардикай межлис кьиле тухузвай Султан Трамовани лагьана.

“Лезги халкьдин ифтар” хъсан дережада аваз кьиле фена.

Агьмед Магьмудов