Дагъустан Республикадин Гьукуматдин Председатель Абдулмуслим Абдулмуслимован регьбервилик кваз 10-апрелдиз, къецепатан себебарни гьисаба кьуналди, региондин экономика дурумлувилелди вилик тухун таъминарунин рекьяй Оперативный штабдин заседание кьиле фена. Идакай “Лезги газетдин” редакциядиз РД-дин Гьукуматдин пресс-къуллугъди хабар гана.
Заседанидал иштиракчийри аялрин арада вирусдин инфекцияр чукIуниз акси серенжемар кьабулунин, яшайишдин объектар эцигунин ва ремонт авунин, республикада гатфарин чуьлдин кIвалахар кьиле тухунин месэлаяр веревирдна.
Оперативный штабдин кIвалах ачухдайла, А.Абдулмуслимова къейдна хьи, обществодин, яшайишдинни экономикадин ва культурадин саламатвилин ва здравоохраненидин менфятлувилин дережа тайинарзавай кьилин крарикай сад аялрин кьиникьихъ галаз алакъалу я.
“Аялрин кьиникьар тIимилардай гьалар таъминарун патал татугай крарин себебар ахтармишун, чирун важиблу я. Акьалтзавай несилдин сагъламвал уьлкведин стратегиядин лап важиблу ресурс я. ГьикI лагьайтIа, акьалтзавай несилдин сагъламвал гележегдин, халкьдин сагъламвални я”, — къейдна РД-дин Гьукуматдин Председателди.
БицIи аялрин сагъламвилиз талукь доклад РД-дин здравоохраненидин министрдин заместитель Раиса Шахсиновади авуна. Ада хабар гайивал, алатай йисуз здравоохраненидин министерстводилай республикада эпидемиядиз (коронавирусдин инфекциядизни) талукь гьалар са кьадар къайдадик кутаз алакьна.
Идалай гуьгъуьниз мярекатдин иштиракчийри яшайишдин объектар эцигзавай ва капитальнидаказ ремонтзавай месэлаяр веревирдна.
А.Абдулмуслимова къейдна хьи, “Образование” ва “Демография” милли проектрин сергьятра аваз Дагъустанда образованидин 58 объект, РИП-дин сергьятра аваз 37 дарамат эцигдайвал я.
“Гьар гьафтеда эцигунар кьиле физвай гьалдал гуьзчивал тухун герек я. Эгер са гьи ятIани объектдал кIвалахар кьулухъ язаватIа, эцигунрал зегьмет чIугвазвай устIаррин, фялейрин кьадар гзафарна, кьве сменада кIвалахдайвал авуна кIанда. Образованидин вири объектар 1-сентябрдалди ишлемишиз вахкун лазим я. Эцигунрин ерини хатасузвилин жигьетдай вини дережада аваз хьана кIанда. ГьикI лагьайтIа, ихтилат чи аялрин сагъламвиликай физва. Ишлемишиз вахкузвай гьар са школада къулай, хатасуз, алай аямди истемишзавай жуьредин шартIар тешкилун важиблу я. Ихьтин шартIара чи аялрин бажарагъ ачух, абурухъ хъсандиз кIелдай ашкъи жеда”, — лагьана премьерди.
РД-дин эцигунрин, архитектурадин ва ЖКХ-дин министр Артур Сулейманова хабар гайивал, республикадин ва федеральный программайрин сергьятра аваз 2023-йисуз 11,1 миллиард манатдин къимет авай яшайишдин 105 дараматдин проектар туькIуьрзава ва эцигунрал кIвалахар кьиле физва. Абурук Гьукуматдин Председателди лагьай образованидин 50 школа ва аялрин 8 бахчани акатзава.
Здравоохраненидин объектрикай рахуналди, министрди лагьана хьи, 2023-2025-йисара эцигдайбуруз пулдин такьатар асул гьисабдай республикадин бюджетдай чара ийида.
“Республикадин инвестицийрин программадин сергьятра аваз 2023-йисуз здравоохраненидин 271,8 миллион манатдин къимет авай 6 объект эцигиз гъиле кьада. Алай вахтунда 4 объектдал эцигунринни монтаждин кIвалахар кьиле тухузва. Са объект жезмай кьван гъилевай йисуз ишлемишиз вахкуз алахъда”, — лагьана А.Сулейманова.
РД-дин образованидин ва илимдин министр Яхья Бучаева хабар гайивал, шаз республикада образованидин 33 объект (7790 чка авай) ишлемишиз вахкана. Гьа гьисабдай яз, 9 школа, аялрин 24 бахча цIи шад гьалара ачухда.
2023-йисуз республикадин муниципальный 36 тешкилатда 139 школа капитальнидаказ ремонт авун патал 3,6 миллиард манат чара ийизва. Къенин йикъалди пландик квай 140-дан чкадал 116 контракт кутIуннава.
Региондин «Модернизация первичного звена здравоохранения» программадик 111 объект кутунва. Абурукай 4 капитальнидаказ ремонтда, 10 цIийикIа туькIуьр хъийида. Фад-фад эцигдай конструкцийрин бинедаллаз 27 дарамат эцигда.
Заседанидал агропромышленный комплексдиз куьмек гуниз ва гатфаринни чуьлдин кIвалахар кьиле тухуниз талукь месэлайрикайни ихтилатна. А.Абдулмуслимова лагьайвал, Дагъустанда 95 агъзур гектарда зулун ва 9 агъзур гектарда гатфарин тумар цанва.
Заседанидин нетижаяр кьуналди, А.Абдулмуслимова образованидин ва эцигунрин хилерай талукь вице-премьеррал соцобъектар лазим дережада лицензироватун ва гьалар чпин хсуси гуьзчивилик кутун тапшурмишна.
Хийир Эмиров
