7-апрелдиз, Дербент шегьердин кьилин ктабханада, Расул Гьамзатован 100 йисан юбилейдин сергьятра аваз, Кьиблепатан Дагъустандин халкьарин чIалар хуьниз талукьарна, шаиррихъ ва лезги, табасаран, азербайжан, рутул чIала­рин муаллимрихъ галаз гуьруьш кьиле фена.

Мярекат тешкилайбур Кьиблепатан Да­гъустандин жегьилрин союз, шегьердин “Баркаллувилин женгинин” музей, ФЛНКА ва ше­гьер­дин кьилин ктабхана тир.

Хуш гьалара кьиле фейи мярекатда ФЛНКА-дин исполкомдин председатель Асрет Ибилкьасу­мова, Лезги писателрин союздин пред­седатель, писатель Абил Межидова, Кьиблепатан Дагъустандин жегьилрин союздин векил Абдул­къа­фар Къафарова, кьилин ктаб­ха­на­дин директор Диана Алиевади, ша­­­ир­ Гъулангерек Ибрагьимовади, ше­гьердин дидед чIаларин муаллимри, лезгийрин, табасаранрин ва азербайжанрин театррин къуллугъчийри, Гь.Къазиагьмедован тIвар­цIихъ галай педколледждин ва Башларован тIварцIихъ галай медколледждин студентри ва масабуру иштиракна.

Мярекат “Баркаллувилин женгинин” музейдин пешекар, Кьиблепатан Дагъустандин жегьилрин союздин къаюмвилин советдин член Гуьл­пери Мирзебалаевади вичиз хас тир хъсан дережада кьиле тухвана.

Анал рахай Диана Алиевади, Абдулкъафар Къафарова, Сардар Абила, Дербент шегьердин ракьун рекьерин музейдин директор Гьажиагъа Мегьамедшерифова, Гъулангерек Ибрагьимовади, даргийрин милли тешкилатдин Дербентда авай отделенидин председателдин заместитель Мурад Кьадиева, табасаранрин театрдин актер Аким Сеидалиева хайи чIалар хуьнихъ авай еке метлебдикай лагьана,  акьалтзавай несилриз дидед чIал чирун гьар садан буржи тирди къейдна.

Яргъал йисара гьакъи­сагъви­лелди зегьмет чIугунай, лезги чIал хуьник ва вилик тухуник аквадай хьтин пай кутунай Дербент ше­гьерда лезги чIаланни литературадин тарсар гузвай муаллимрив — Регина Алиевадив, Муъминат Рамазановадив (СОШ №15), Равият Муъминовадив (СОШ №20), лезги чIалан муаллимрин методобъединенидин руководитель Элейханум Муталибовадив, Рагнета Алибеговадив (педколледж), педагогвилин зегьметдин ветеран Зиядхан Къарахановав, Абил Межидовав, Гуьл­пери Мирзебалаевадив ва Имамудин Агъабалаевав ФЛНКА-дин патай гьуьрметдин грамотаярни пулдин пишкешар вахкана.

Къагьриман  Ибрагьимов