23-июндиз Хасавюрт райондин Къурушрин хуьре Социализмдин Зегьметдин Игит Сейфедин Рамазанович Къулиеван 110 йис тамам хьуниз талукьарнавай мярекат кьиле фена. Дагъларин уьлкведин хуьруьн майишат вилик тухуник лайихлу пай кутунай адаз пуд сеферда Ленинан орден ганай. Игитдин тIварцIихъ республикадин меркездин са куьче гала.
Бажарагълу тешкилатчи Сейфедин Къулиев рикIел хкунин мярекатда Россиядин ва Дагъустандин жуьреба-жуьре шегьеррай, районрай атанвай мугьманри ва хуьруьнвийри иштиракна. Абурун арада РД-дин Халкьдин Собранидин Председателдин заместитель яз кIвалахай республикадин сиясатдин деятель Гьасен Балатов, Хасавюрт райондин администрациядин кьилин заместитель Нурула Муртузалиев, Хасавюрт райондин Общественный палатадин член Къалсын Акгезов, “Лезги газетдин” кьилин редактор Мегьамед Ибрагьимов, партиядин обкомдин секретарь Зияудин Пулатов, “Самурэнерго” ООО-дин генеральный директор Шихсефи Сефиханов, генерал Шамил Асланов, машгьур общественный деятель, медицинадин илимрин кандидат Нариман Рамазанов, эцигунардай “Яры-Даг” карханадин регьбер Нурали Мегьмандаров, Къурушрин хуьруьн 1-нумрадин юкьван мектебдин директор Ислам Гьажиметов, Къурушрин хуьруьн агъсакъал Мамед Дагъларов, экономикадин илимрин кандидат Алик Набиев ва масабур авай.
Юбилейдиз талукьарнавай митинг гатIундалди, иштракчийри Сейфедин Къулиеван гуьмбетдал цуьквер эцигна.
Мярекат и цIарарин авторди ачухна ва сифте гаф Къурушрин хуьруьн администрациядин кьил Рафик Юсуповаз гана.
Хуьруьн имам Азим-гьажи Панагьова Игитдин руьгьдиз дуьа авурдалай кьулухъ, мярекатдал рахай гзафбуру Сейфедин Къулиеван уьмуьрдин ва кIвалахдин рекьерикай ихтилатарна, адаз хас ерияр, талукь делилар, адахъ галаз алакъалу вакъиаяр рикIел хкана. Гьасен Балатова Къурушдал Социализмдин Зегьметдин Игитдин тIварцIихъ галай проспект арадал гъунин теклиф гана.
Къурушрин хуьруьн юкьван мектебра чирвилер къачузвай аялри кIелай С.Къулиеваз бахшнавай шиирар мярекатдин иштиракчийри хушдиз кьабулна.
РикIел хкин, къурушвияр 1952-йисуз Хасавюрт райондин баябан чуьллера цIийи хуьр кутаз гатIунна. Абуру, сад хьана, К.Марксан тIварунихъ галай колхоз арадал гъана. С.Къулиева регьбервал гузвай и майишатдин тIвар са гъвечIи геренда вири уьлкведиз чкIана. Гуьгъуьнал алай йисара ина уьзуьмчивилин хел иллаки вилик фена. Къулиеван майишатди йисан къене 15 агъзур тонндив агакьна бегьер гузвай. И жигьетдай къурушвийрин майишат къудратлу Советрин Союзда кIвенкIвечибурун жергеда авай.
Мярекатдал рахай бязи юлдашри зурба зегьметар чIугуна арадал гъайи девлетар къе тар-мар хьанвайди, хейлин инсанар кIвалахар амачиз амукьнавайди къейдна. Абуру къурушвийри чпин чIехи бубайрин баркаллу крарал чан хкидайдак умудар кутуна.
Митингдин эхирдай Сейфедин Къулиеван хтул Эльдер Къулиева Къурушдал хтанвай мугьманриз, хуьруьн жемятдиз сагърай лагьана.
Гьажи Къазиев
