26-июндиз РД-дин Гьукуматдин Председатель Артем Здунова Дагъустандин дагълух районра яшамиш жезвай агьалийрин дуланажагъ хъсанарунин месэлайриз талукьарнавай совещание кьиле тухвана.
Алай вахтунда республикадин 30 муниципалитет дагълух мулкарик акатзава. Анра, санлай къачурла, 1186 хуьр ава ва 920 агъзур инсан яшамиш жезва.
Совещанидин сергьятра аваз, РД-дин экономикадин ва мулкар вилик тухунин министр Осман Хасбулатова Дагъустанда государстводин “2014-2018-йисара республикадин дагълух мулкар яшайишдинни экономикадин рекьяй вилик тухун” программа кьилиз акъудзавай гьалдикай ихтилатна. Адан гафарай малум хьайивал, 2014-йисалай инихъ программада къалурнавай мярекатриз пулдин такьатар бюджетдинбур тушир чешмейрай чара ийизва.
“Бязи районра теплицайрин комплексар, некIедин фермаяр, некIедин ва якIун суьрсет гьялдай цехар эцигнава, цIийи рекьер туькIуьрнава, хъвадай цин турбаяр тухванва. Гьа са вахтунда программада къалурнавай мярекатар кьиле тухун патал 2018-йисуз государстводин патай пулдин такьатар чара авун фикирдиз къачунвач”, — лагьана О.Хасбулатова.
Совещанидал дагълух районра хуьруьн майишатдин, балугъчивилин цIийи карханаяр эцигунин, дарманар квай набататар кIватIунин, халкьдин сеняткарвилерал чан хкунин ва маса теклифар гана.
Артем Здунова талукь министерствойрал ганвай теклифар веревирд авун ва абур уьмуьрдиз куьчуьрмишун патал гьихьтин рекьер аватIа тайинарун тапшурмишна.
“Чна дагълух районра яшамиш жезвай агьалияр кIвалахдай чкайралди таъминарна кIанда. И кар кьилиз акъудун патал дагълух чкада вилик тухуз жедай асул хилер тайинарун герек я. Инсанриз суьрсет арадал гъидай ва ам маса гудай шартIар тешкилун государстводин везифа я”, — къейдна республикадин премьер-министрди.
«Лезги газет»
