“Лезги газетдин” алатай йисан 10-нумрада кьилин редактор Мегьамед Ибрагьимован “Агьалийрик къалабулух акатнава” тIвар алай макъала чапнай. Куьрелди рикIел хкайтIа, ана “Газпромдин” дочерний компаниядин арзадилай гуьгъуьниз, суддин къарардалди, Мегьарамдхуьруьн райондин Филерин хуьре саки 15 кIвал чукIурна кIанзавай дараматрин сиягьда гьатнавайдакай кхьенвай. Идан себебни яшайишдин кIвалер “Моздок-Къазимегьа­мед” магистральный газопроводдиз мукьва хьун тирди къейднавай. Анлай инихъ йисалай артух вахт алатнава, амма агьалийрик акатнавай къалабулух секин хьанвач. Керчекдиз лагьайтIа, ам генани артух хьанва.

Филерин хуьруьн администрациядин кьил Абдулмалик Эмиргьамзаева “Лезги газетдиз” хабар гайивал, алай йисан 23-июндиз Филерин хуьре судди кьабулнавай къарардиз акси тирбур кIватI хьана. ЧукIурна кIанзавайбур яз къейднавай кIвалерин иесийри суддин къарар къанунсузди яз гьисабзава ва ам къуватдай вегьин тIалабзава. Чкадин агьалийрин гафаралди, 20 йис идалай вилик кIва­лер эцигун патал чпиз и чилер вири къанунар вилив хвена чара авунва.

А.Эмиргьамзаеван фикирдалди, арадал атанвай гьаларин тахсиркарар чпин везифаяр намуслувилелди кьилиз акъуд тавур газдин къуллугъдин векилар я.

“И мулкунал къанунсуз эцигнавай са кIвални алач. Чилерни вири къанунар фи­кирда кьуна чара авунва. Гьар са кIва­лихъ кадастрдин нумра, хсусият тирди тестикьарзавай ва маса документар ава. Вири и документар чна гьам суддин, гьамни “Газпром трансгаз Махачкала” карханадин векилриз къалурна, амма абуруз садани фикир гузвач”, — лугьузва А.Эмиргьам­заева.

“Чилер чара ийизвай вахтунда абур райондин администрациядин ихтиярда авай, гуьгъуьнлай и мулкар хуьруьн администрациядин ихтиярда хтуна. И арада райондин руководстводи чилерал яшайишдин кIвалер эцигун къадагъа тирдакай хабар ганач.

Газдин къуллугъдин пешекаррив “ха­та авай зонаяр” тайинарзавай махсус приборар гва. Абур чпин кIвалахдал маш­гъул жезвайтIа, “хата авай зона” гьина аватIа пешекарриз хъсандиз чир жедай. Адакай чилерал кIвалер эцигна 20 йис алатайла ваъ, вахтунда хабар гудай”, — алава хъувуна Филерин хуьруьн администрациядин кьили.

КIвалерин иесийрин тереф хуьзвай ад­вокат Альбина Абдулкеримовади гьисабзавайвал, судди къарар вири месэ­ла­яр­ тамамдиз ахтармишна акъуднавач. Ад­­вокатдин гафаралди, чилер чара ийидайла “хата авай зонадин” ва газопроводдин сергьятар тайинарнавачир. Я карта, я гьи мулкар “хата авай зонадик” акат­заватIа къалурнавай са документни авачир. Агьа­лийривни и мулкарал кIва­лер эци­гун къа­дагъа тирдакай хабар ­гузвай са жуьредин телни агакьнач. Ихьтин шартIара абуруз кIвалер эцигдай ихтиярар авани, авачни гьикI чир жедай кьван?

“Судди къарар кьабулдайла кIвалер къанун вилив хвена эцигнавани, эцигнавачни фикирда кьунвач. Са бинени авачиз, кIвалер “хата авай зонадик” акатзава лагьана къарар акъуднава. КIвалер чукIу­райтIа, абуруз акъатнавай кьван харжияр ни вахкуда? И месэла садани къарагъарзавач. Алай вахтунда суддин къарардалди чукIурзавай кIвалерин сиягьда Филерин хуьре — 15 кIвални къандахар янавай, эцигунардай материалар алай кьве участок, ЦIийихуьре 10 кIвал гьатнава. Мад вад кIвал чукIурунин месэла алай вахтун­да судда веревирдзава”, — лугьузва А.Абдулкеримовади.

“Чун чи кIвалерай чукурзава. Захъ пуд аял ава. Жуван гьалал зегьметдалди кьил хуьзва, къазанжи къвезвай маса пад авач. 14 йисан къене за кIвал эцигна. Анжах 2014-йисуз зи патав газдин къуллугъдин ве­килар атана ва за кIвал къанунсуздаказ эцигнава лагьана, суддиз арза кхьена. Захъ кIвал къанунар вилив хвена эцигнавайди тестикьарзавай вири документар ава. Захъ хьиз, амайбурухъни. Амма и де­лилриз садани фикир гузвач…”, — лу­гьуз­ва кIватIалдин иштиракчи Равшан Мегьамедова.

Адан гафарай малум хьайивал, кIва­лер чукIурунин жигьетдай судди кьабулнавай къарар кьилиз акъуднач лугьуз, агьа­лийрин кIвачихъ жермеяр язава. “Тек са зи кIвачихъ алай вахтунда 28 агъзур ма­нат пул жерме янава. Амай юлдашрин кьилни гьа ихьтин баладик акатнава. Чи хсусият дустагънава, чаз къецепатан уьлкведиз фидай ихтиярар авач. Суддин при­с­­таври, мукьвал-мукьвал къвез, чак къур­ху кутазва”, — вичин наразивал къалурзава Р.Мегьамедова.

А.Эмиргьамзаева хабар гайивал, “хата авай зонадик” акатнавай кIвалерин иесийри Дагъустандин Кьилин везифаяр вахтуналди тамамарзавай Владимир Васильеваз арадал атанвай гьаларай кьил акъудун патал чар кхьена. РД-дин Кьилин аппаратдай хтай жавабдай малум хьайивал, республикадин руководстводи “Газпром”-дивай кIва­лер чукIур тавун патал газдин турба масанай тухун тIалабна. Амма “Газпром” и кардиз акси хьана. Карханадиз ­газдин турба масанай тухун патал акъатзавай харжияр вичин хивез къачуз кIан­завач.

Мадни чарче къейднавайвал, респуб­­ли­­­кадин руководстводи РД-дин финансрин ми­­нистерстводиз къведай йисан бюджетдик газдин турба масанай тухуниз акъат­­завай пулдин такьатар кутунин тапшуругъ ганва.

“За судди акъуднавай къарар къанунсузди тирди мад сеферда тестикьарзава. Чна — Филерин ва ЦIийихуьруьн агьалийри гьукумдивай куьмек тIалабзава. И дуь­шуьш­да гьакъикъатдани инсанрин ихтиярар чIурзава. Ихьтин гьахъсузвилериз рехъ га­на виже къведач. Месэла кIвалер чу­кIур тавуна гьялиз жезва. И карда республикадин руководстводи халкьдин тереф хуьдайдак за умуд кутазва”, — лагьана Абдулмалик Эмиргьамзаева.

Агьмед Магьмудов