“Лезги газетдин” активный мухбиррикай сад, Россиядин журналистрин ва лезги писателрин cоюзрин член, “Куьредин хабарар” газетдин жавабдар секретарь Хазран Кьасумован 65 йисан юбилейдиз талукьарнавай материалар “Лезги газетдин” алай йисан 12-нумрадиз акъатнай. Мукьвара СтIал Сулейманан райондин Эминхуьруьн администрациядин актовый залда и вакъиадиз талукьарнавай шадвилин гурлу мярекат кьиле фена. Ам чкадин администрациядин куьмекдалди хуьруьн библиотекадин заведующий Алла Буржалиевади тешкилнавай.
Мярекат ачухдайла, Алла Буржалиевади писатель ва журналист Хазран Кьасумован уьмуьрдин ва яратмишунрин рекьикай гегьенш рахунар авуна.
Эминхуьруьн администрациядин кьил Сабир Юзбегова вичин, чкадин депутатрин ва вири хуьруьнвийрин тIварцIихъай юбилярдиз хайи югъ мубаракна, адал дамахзавайди къейдна ва хуьруьн жемиятдинни медениятдин уьмуьрда активнидаказ иштиракунай Х.Кьасумоваз Чухсагъулдин чар, къиметлу пишкешар гана.
Мярекатдиз, СтIал Сулейманан райондин администрациядин информагентстводин руководитель Гуьллер Камилова кьиле аваз, райондин сайтдин, “Куьредин хабарар” газетдин ва Кьасумхуьруьн телевиденидин къуллугъчийрин са десте атанвай. Абуру чпин кIвалахдин юлдаш Хазран Кьасумовакай алхишдин гзаф келимаяр лагьана, журналист, писатель, шаир ва фотокорреспондент яз, адан бажарагъ, кьетIен хатI, кIвалахдин тегьер къейдна. Тебрикдин келимайрилай гуьгъуьниз абуру юбилярдиз пишкешарни гана.
Мярекатдал мад Эминхуьруьн юкьван школадин директор, РД-дин лайихлу муаллим Рагьман Османов, РФ-дин писателрин ва журналистрин союзрин член Вадим Жамалдинов, Эминхуьряй тир гьевескар манидар ва шаир Раижат Жигерова, Эминхуьруьн агъсакъалрин советдин членар тир “Хутаргъар” ва “Хутаргъвияр” ктабрин автор Исмаил Агьмедов, “Ша лагь заз” ктабдин автор Къафлан Османов, Абдуразакь Сакаржаев, хуьруьн Етим Эминан музейдин директор Гьайбатулагь Манатилов, муаллимар тир Гуьлханум Наврузова, Жейран Мирзоева ва масабурни рахана.
Школада кIелзавайбуру Хазран Кьасумован шиирар хуралай кIелна, адан къаравилийрин бинедаллаз эцигнавай сегьнеяр къалурна, кьуьлер авуна. Манидарри межлис мадни гурлу авуна. Эхирдай рахай Хазран Кьасумова мярекат тешкилай ва ана иштиракай вирибуруз сагърай лагьана.
Асият Мирзалиева,
“Куьредин хабарар” газетдин кьилин редактор
