31-мартдиз Дербентдин депода сифте сеферда яз, РЖД ОАО-дин президентдин тапшуругъдин бинедаллаз, цIийи сувар — Машинистдин югъ (гьар йисан мартдин эхиримжи жуьмя югъ) хуш гьалара къейдна.
Виликдай машинистри пешекар сувар, ракьун-рекьин амай вири къуллугъчийри хьиз, гьар йисан августдин сифте гьяд юкъуз къейдзавайди тир. Гила машинистрихъ чпин кьилдин суварин югъ хьанва.
Деподин клубда ракьун рекьин къуллугъчияр ва патарилай атанвай мугьманар кIватI хьана. Мярекатдин тешкилатчи ракьун рекьин Махачкъаладин региондин жегьилрин советдин председатель, деподин техотделдин начальник, машинист-ветеран Мегьамед Кьасумован хва Расул Кьасумов тир. Ада мярекат хъсандаказ кьиле тухвана.
Машинистриз сувар тебрикиз атайбурун арада Кеферпатан Кавказдин ракьун рекьин Махачкъаладин региодин начальникдин куьмекчи Захар Адамов, СКЖД-дин тягадин дирекциядин начальникдин куьмекчи Павел Бутюгов, Дербентдин деподин начальник Олег Годунок, Махачкъаладин региондин ДОРПРОФЖЕЛ-дин хилен председатель Нурудин Феталиев, Дербент шегьердин кьилин куьмекчи Видади Зейналов, Дербент шегьердин ветеранрин советдин председатель Гьажимурад Гьажимурадов ва масабур авай.
Тебрикрилай гуьгъуьниз са кьадар машинистриз гьар дережайрин лайихлу шабагьар гана. Кьилди къачуртIа, “Дербент-Сергьят” электричкадин машинист Гьажиагьмед Гьабибуллаеваз (ам Самурдай я) СКЖД-дин начальникдин патай “Чухсагъулдин чар”, электровоздин машинист Данил Гирчехановаз (кIелетви) — Дербент шегьердин кьилин “Чухсагъулдин чар” гана.
Виридалайни яшлу ветеранрикай сад тир СтIал Сулейманан райондин Уллу-Гъетегърин хуьруьнви Закидин Тажибовазни сувар мубаракна. 12 йисавай аял яз ам дяведин йисара хайи колхозда кIвалахар авуниз мажбур хьана. Начагъвиликди фронтдиз тухун тавур буба дяве куьтягь жедалди телеф хьана. 1949-йисуз жегьил Дербентдиз атана, ракьун рекьерин училищеда кIелна, паровоздин машинистдин куьмекчивилин пеше чирна. Кьве йисалай Дербентдин депода паровозар ремонтдай слесарвиле кIвалахал акъвазна. Ахпа, йисаралди чирвилер артухариз, паровоздин, тепловоздин ва электровоздин машиниствиле кIвалахиз хьана.
И деподин начальникдин заместителдин везифаяр Ариф Мегьтиханова тамамарзава. Ам машинист яз хьайи рагьметлу Эмирмет Мегьтиханован хва я. Бубадин пеше давамарзавай ам 2-классдин машинист я.
Гьажиагъа Мегьамедшерифов
