Дагъустандин Яшайишдин фондунин пресс-къуллугъдин регьбер Альбина Сункъулиевади хабар гузвайвал, 1-апрелдилай яшайишдин пенсиядин кьадар, 2022-йисан июндиз 10 процентдин хкажайдал алава яз, 3,3 процентдин артухарнава. Адан кьадар пенсионерриз яшамиш хьун патал вилик квай йисуз тайинарнавай агъа кIанин пул (прожиточный минимум) хкаж хьунилай аслу жезва.
Адет хьанвайвал, пенсийрин кьадар, инфляциядилай аслу яз, йиса са сеферда 1-апрелдилай хкажзава. Амма 2022-йисан инфляциядин кьадар гзаф хьунилай аслу яз, агьалийрин дуланажагъ хъсанарун патал яшайишдин са жерге выплатаяр, са шумуд этапдиз пайна, артухарунин къарар кьабулна.
Яшайишдин пенсия страховой пенсия тайинарун патал чпихъ кIвалахдин тайин хьанвай стаж авачир агьалийриз гузва. Идалайни гъейри, и выплата инвалидар ва хизан хуьзвай кас кьилелай алатнавайбур патални тайинарзава.
«Лезги газет»
