В.Путина СВО-дин иштиракчийриз ва телеф хьайи аскеррин
хизанриз куьмек гудай “Ватан хуьзвайбур” фонд арадал гъанва
Россиядин Прездент Владимир Путина военный махсус серенжемдин ветеранриз, 2014-йисалай гатIунна Донбассда кьиле физвай женгерин иштиракчийриз, телеф хьайи аскеррин хизанриз куьмекар гунал машгъул жедай государстводин махсус “Ватан хуьзвайбур” фонд арадал гъун тестикьарна. И кардин гьакъиндай къарар 3-апрелдиз правовой информациядин официальный сайтда чапна.
ЦIийи къурулушдин председатель къванцин цIивин хкудунал машгъул “Колмар груп” тешкилатдин директоррин советдин кьил Анна Цивилева я. 2019-йисалай ам РФ-дин Гьукуматдин къвалав гвай яшайишдин хиле къаюмвилер авунин месэлайрай советдик, парламентдин вини палатадин патав гвай Евразиядин дишегьлийрин форумдин советдикни ква.
Ихьтин фонд арадал гъиз кIанзавайдакай сифте яз В.Путина 21-февралдиз Федеральный Собранидиз ракъурай Чарче малумарна. А чIавуз Президентди къейднай хьи, фондунин къурулушри гьа и йисуз вири регионра кIвалах авун герек я.
Къарардал асаслу яз, цIийи къурулуш “СВО-дин иштиракчийриз, маса ксариз ва абурун хизанриз лайихлу уьмуьр таъминардай шартIар арадал гъун патал” герек я. Фонд тешкилайди (учредитель) РФ-дин Гьукумат я. Къурулушдиз федеральный бюджетдин, гьакIни чпин хушуналди чара ийидайбурун такьатар ахъайда.
Дагъустандин Кьил Сергей Меликова республикадин гьукумдин органрин регьберрихъ галаз кьиле фейи совещанидал ихтилат авурвал, государстводин “Ватан хуьзвайбур” фондунин подразделениди Дагъустанда 1-июндилай кIвалахда.
Къейд ийин, алатай йисан апрелдиз С.Меликован теклифдалди яшайишдин “Вири санал” фонд арадал гъанай. Адан везифа, махсус серенжемда телеф хьайи аскеррин хизанриз, государстводи гузвай куьмекдилай гъейри, алава куьмек гуникай ибарат я.
Чи мухбир
