И йикъара Каспийск шегьерда, Али Алиеван тIварунихъ галай спортдин дворецда, 2009-2010-йисара дидедиз хьайи жаванрин арада боксдай республикадин кIвенкIвечивал патал акъажунар кьиле фена. Ана Дагъларин уьлкведин районрайни шегьеррай тир 200-далай виниз жаван боксерри чпин гъутарин устадвал къалурна. Абурун арада СтIал Сулейманан райондин администрациядин спортдин, туризмдин ва жегьилрин крарин рекьяй комитетди рекье тунвай спортсменарни авай.
ИкI, турнирда иштиракай, КIварчагъа боксдай кардик квай ДЮСШ-дин тренер-муаллим Альберт Межидован гъилик вердишвилер къачузвай Имам Сейфулаева 54 кг-дал къведалди заланвал авайбурун арада гъалибвал къазанмишна. Жаван боксердиз чIул, кубок, медаль ва грамота гана.
А.Межидован гъилик вердишвилер къачузвай жаванри республикадилай къеце кьиле физвай акъажунрани датIана иштиракзава ва кIвенкIвечи чкаярни кьазва. Имам Сейфулаеван им сад лагьай гъалибвал туш. Гила ада нубатдин — СКФО-дин акъажунриз гьазурвал аквада. Къуй жавандихъ мадни еке агалкьунар хьурай!
Рагнеда Рамалданова
