Алатай гьафтеда Докъузпара райондин ЦIийи Къаракуьре хуьруьн спорткомплексда, “Муаллимдин ва насигьатчидин йисаз” талукьарна, педколлективрин командайрин арада волейболдай акъажунар кьиле тухвана. Идакай чаз райадминистрациядин пресс-къуллугъди хабар гана.
Райондин администрациядин образованидин управлениди кьил кутуналди тешкилнавай спортдин серенжемдин макьсад волейбол машгьурун, вилик тухун, къугъвазвайбурун устадвал хкажун, сагълам уьмуьр кьиле тухун пропаганда авун ва школайрин коллективрин арада дуствилин алакъаяр мягькемарун тир.
Акъажунар ачухуниз талукьарнавай мярекатдал райондин кьилин заместитель Салигь Гьажимурадова иштиракзавай ксарин тIварцIихъ чими келимаяр лагьана, абурухъ агалкьунар хьун алхишна. Акъажунра ада вичини иштиракна, ам образованидин управленидин командадик кваз къугъвана. Вири санлай акъажунра 6 командади иштиракна.
Къизгъиндаказ кьиле фейи къугъунрин нетижада ЦIийи Къаракуьре хуьруьн юкьван школадин команда 1-чкадиз лайихлу хьана. Образованидин управленидин командади — 2 ва Усугъчайдин хуьруьн юкьван школадин командади 3-чкаяр кьуна.
Гъалиб хьайи ва приздин чкаяр кьур командайриз пулдин пишкешар ва грамотаяр гана.
Рагнеда Рамалданова
