28-мартдиз Махачкъалада “Дагестанская правда” газетдин 105 йис тамам хьуниз талукьарнавай мярекат кьиле фена. Ана РД-дин Гьукуматдин Председатель Абдулмуслим Абдулмуслимовани иштиракна.
Мярекат гатIундалди вилик иштиракчияр республикадин Дуствилин кIвалин фойеда ачухнавай газетдин тарихдиз талукь выставкадихъ галаз таниш хьана.
Юбилейдин межлис ачухдайла, премьер-министрди РД-дин Кьил Сергей Меликован Тебрикди тел кIелна ва “Дагестанская правда” газетдикай вичин фикирар лагьана.
“Асирдилай артух девирда “Дагестанская правда” газетди халкьдихъ галаз санал уьлкведин ва республикадин яшайишдинни сиясатдин уьмуьрда иштиракзава. Чна газет арадал гъунин, вилик тухунин карда кьетIен чка кьунвай инсанрин тIварар рикIелай алудна виже къведач. Сад лагьай редактор Алибег Тахо-Годи тир. Гуьгъуьнлай газетдиз жуьреба-жуьре йисара Ибрагьим Алиева, Иван Грушнина, Александр Назаревича, Петр Кушнева ва масабуру регьбервал гана”, — къейдна А.Абдулмуслимова.
Гьукуматдин Председателдин фикирдалди, “Дагестанская правда” газетди вири четинвилериз, имтигьанриз таб гана. Виликдай хьиз, къенин юкъузни халкьдин итижриз къуллугъзава, руьгьдинни эдебдин ивирар, халкьарин арада дуствилин алакъаяр хуьник, республика яшайишдин рекьяй вилик финик лайихлу пай кутазва.
“Газетдин коллективдилай Дагъустандин публицистикадин ирс, адан виридалайни хъсан адетар хуьз алакьнава. Заз кьилин редактор Бурлият Мовсаровнадин регьбервилик кваз газетдин коллективдихъ мадни еке агалкьунар хьана кIанзава”, — лагьана А.Абдулмуслимова.
“Дагестанская правда” газетдин редакциядиз юбилей мубарак авурбурун арада гьакIни РД-дин Халкьдин Собранидин, жуьреба-жуьре министерствойринни ведомствойрин векиларни авай.
Мярекатдин сергьятра аваз, Абдулмуслим Абдулмуслимова газетдин редакцияда кIвалахзавай са жерге журналистрив РД-дин Гьукуматдин патай Разивилин чарар (благодарность) вахкана.
“Дагестанская правда” газетдин 105 йис тамам хьунихъ галаз алакъалу яз, писатель ва журналист Жабраил Алиеван “Люди с красными глазами” тIвар алай роман кьилдин ктаб яз чапдай акъатнава. Ана газетдинни Октябрдин инкъилабдин тIварцIихъ галай къаналдин юбилейрин арада авай алакъа къалурнава.
Агьмед Магьмудов
