Самурдин милли паркуна 2023-йисуз сиягьатчийрин кьадар гзаф хьун гуьзлемишзава. Дагъустандин кьиблепата авай, вич Россияда тек сад тир лианайрин та­­ма куьр­сарнавай жуьредин (чиливай хкажнавай) кIва­чин экорехъ туь­кIуьрд­ай­вал я. Туристрин сезон башламишдайла, еперикай туь­кIуьрнавай парк ва “куьр­сарнавай рехъ” ачухда. Идакай государстводин “Да­гъустандин” заповедникдин” директор Къурбан Куниева хабар гана.

“Самурдин милли паркунин “Самурдин дельта” кластерда экологиядин истемишунриз жаваб гудайвал туькIуьрнавай  рехъ ачухда. Майдин вацра ана гьакIни  еперикай туькIуьрнавай паркни,  “куьрсарнавай­ жигъирни” кардик кутада. Адан куьмекдалди мугьманривай Самурдин тамун  тарарин танарин арайра сейр ийиз жеда”, — лагьана Къ.Куниева.

Ада хабар гайивал, 2023-йисуз  милли паркунин мугьманрин кьадар виле акьадайвал гзаф хьун гуьзлемишза­ва. “Милли паркунин экосистемадиз  гун мумкин тир чIуру таъ­сир жезмай кьван тIимилардай къурулушар арадал гъун важиблу я”, —  гьисабзава заповедникдин директорди.­

Чинардин, макъун, мегъуьн ва гийин тарарин муракаб комплексрикай ибарат тир Самурдин лианайрин таму идалай вилик Самур ва­цIун кьер кьунвай. Тамун  (“Самурдин дельта” кластердин) 500-далай гзаф жуьрейрин набататрин арада анжах и чкада, дегь девирри­лай экъечIзавайбур, гьакIни кьитдиз гьалтзавайбур,  михьиз квахьунин къурхулувилик квайбур гьалтзава. Абур Россиядин ва Дагъустандин Яру ктабра гьатнава­.

Самурдин милли парк Ахцегь, Докъузпара, Дербент ва Мегьарамдхуьруьн районрин мулкарал  2019-йисуз тешкилна. Милли паркунин  мулкуник кьве кластер акатзава — аранда, гьуьлуьн къерехда авай “Самурдин дельта” участок ва кьакьан дагъда авай “Шалбуздагъ” участок. Санлай къачурла, милли паркунин майдан 48 273 гектардиз барабар я.

Гьазурайди — Жасмина Саидова