Дагъустандин яшайишдин фондунин (СФР) пешекарри хабар гузвайвал, лутуйри пенсионерар ва пособияр къачузвай ксар алдатмишун патал алахъунар ийизвай дуьшуьшрин кьадар артух хьанва.  Лутуйрин къаст, агьалийривай хсуси рекъемар къачуна, абурун счетрай пулар чуьнуьхун я. Идакай “Дагъустандин экономика” телеграм-каналди хабар гузва­.

Яшайишдин фондунин пресс-къуллугъди виликамаз хабар гузва: эгер са ни ятIани, зенг авуна, вич яшайишдин фондунин къуллугъчи я лагьана, квез хсуси рекъемар це лагьайтIа, адан истемишун эсиллагь кьилиз акъудмир.

“Фондунин пешекарри СНИЛС, паспортдин рекъемар, банкунин картадин ва адан ПИН-коддин нумра ва я тахьайтIа “хсуси кабинетдин” пароль лугьун садрани тIалабдайди туш. Эгер квез телефондай ихьтин делилар це лагьайтIа, якъин я абур лутуяр хьун”, — лагьана РД-дин яшайишдин фондунин отделенидин управляющий Мегьамед Исаева.

Лутуйрив ихьтин теклифар хьун мумкин я: пенсиядал алава пул эля хъувун; выплатаяр туькIуьриз ва я тахьайтIа абурун гьахъ-гьисаб хъийиз куьмек гун; пособияр ва я маса пулар ракъу­рун патал рекъемар дуьзбур ятIа гекъиг хъувун…

Дагъустандин яшайишдин фондуни шаклу тир зенгериз ихтибар тавун патал кьетIидаказ эвер гузва. Лутувилел шак фенмазди, гьасятда ихтилат акъвазарун, яни телефон хкудун меслятзава­.

Мадни чир хьун герек я: СФР-дин къуллугъчияр, пенсиядин рекьерай къуллугъар (услуги) теклифиз, агьалийрин кIвалериз физвайди туш. Эгер куь ракIар вилив хуьн тавур мугьманди гатай­тIа­ ва чеб яшайишдин фондунин къуллугъчияр я лагьайтIа, абурухъ галаз алакъа хуьмир.

Къейд ийин хьи, СФР-ди чпин вири къуллугъар онлайн-къайдада муьштерийриз талукь разделра ва “Госуслуги” порталда пулсуз кьилиз акъудзава. Махсус пулар (выплаты) агьалийри агакьарай арзайрин ва я тахьайтIа фондуна авай рекъемрин бинедаллаз гузвайди я.

Гьазурайди — Муса Агьмедов