Дагъустандин Яшайишдин фондунин пресс-къуллугъди хабар гузвайвал, аялриз полиомиелитдин вакцинация ягъуникай кьил къакъудзавайбуруз “сад тир пособие” гун акъвазарда лугьудай ванер-сесер гьакъи­къатдихъ галаз кьан тийизвайбур я. Халкьдин арада и къалп хабар чукIуникди идарадиз гзаф арзаяр къвезва.

Яшайишдин фондунин пресс-къуллугъди къейд авурвал, аялрин пулар къачузвай, амма гьа са вахтунда полиомиелитдиз акси вакцинация авуникай кьил къа­къудзавай ксарихъ пособийрин жи­гьет­дай къалабулух акатунин са себебни авач. Тайинарнавай пособияр абуру, икьван гагьда къачурвал, инлай кьулухъни къачуда.

Идарадин пресс-къуллугъди гьакI­ни ри­кIел хкайвал, Дагъустанда “сад тир пособие” къа­чун патал тестикьарнавай ар­зайрин кьадар­ 113 агъзурдаз барабар я. И пособиди агьа­лий­ри икьван гагьда къачуз хьайи са шу­муд по­со­бие эвезда: сад ла­гьай аял хьайи­ла, гьар вац­ра гуз­вай­ кьве пособие, 3-далай 7-дал кьван ва­ 8-далай 17-дал кьван йисарин­ яшара­ авай аялриз гузвай пособияр ва гьакIни кIва­чел залан дишегьлийриз гьар вацра гузвай по­собие.

Чи мухбир