Дагъустан Республикадин Кьилин къвалав гражданвилин общество вилик тухунин ва инсандин ихтиярар хуьнин рекьяй Совет гва. Ам 2002-йисалай кардик ква. Шаз ада къад йисан юбилей къейдна.
Алатай гьафтеда Советдин нубатдин заседание кьиле фена. Анал агъадихъ галай месэлайриз килигна: алатай йисан кIвалахдиз талукь гьахъ-гьисаб; Махачкъала шегьерда Советдин векилри агьалияр кьабулдай чка тешкилун; Советдин алакъадин десте арадал гъун.
Пуд месэладин гьакъиндайни рахунар Советдин председатель Зикрулла Ильясова авуна. Ада къейд авурвал, алатай йис уьлкве ва республика патални муракабди хьана. Украинада кьиле тухуниз мажбур хьайи махсус серенжемди гзаф хилериз, крариз таъсирна. Кьилинди, халкьар, агьалияр государстводи, Президентди вилик эцигнавай везифайрин гъавурда гьатна ва абуру амалзавай сиясатдин тереф хуьзва.
— Ихьтин шартIара гражданвилин общество вилик тухунин ва инсандин ихтиярар хуьнин рекьяй Советдин везифаярни артух хьана, — лагьана З.Ильясова. Агьалийрихъ галаз гуьруьш хьун, абур са бязи месэлайрин гъавурда тун, кIеве авай инсанриз куьмек гун, дердияр тамамарунал талукь идараяр желб авун кар алай къайгъуйриз элкъвена.
Председателди лагьайвал, алатай йисуз Советди важиблу месэлайриз талукьарнавай 17 заседание кьиле тухвана. Советдин членар Ботлих, Гумбет, Къизилюрт, Казбек, Шамил районриз фена, анра общественный организацияр ва объединенияр тешкилзавай гьал вилик физвай, гражданвилин жигьетдай кьил кутазвай крар аватIа чирна. Тежрибади къалурзавайвал, общественный организацияр кардик квай чкайра синихриз, гъалатIриз тIимил рехъ гузва. Арадал къвезвай месэлаяр жемиятдин векилри винел акъудзава ва гьукумдин органри абур гьялзава. Крар икI тешкилнавай районра агьалийри гьукумдин органрихъ, чкадин регьберрихъ ихтибарни ийизва.
Малум хьайивал, Советдин векилри республикадин жаванрин, жегьилрин арада чпиз авай ихтияррикай малуматар гун патал жуьреба-жуьре мярекатар кьиле тухвана. ГьикI лагьайтIа, вичин ихтияррикай хабар авай касди талукь органривай абур дуьздаказ кьилиз акъудунни истемишда.
Заседанидал Дагъустандин профсоюзрин комитетдин председатель Абдулла Мегьамедов, Советдин махсус комиссийрин председателар — Раисат Османова, Фикрет Къарибов ва масабур рахана.
Чи мухбир
