Шаз 1441 ДТП хьана
Дагъустандин МВД-дин пресс-къуллугъди хабар гузвайвал, 2022-йисуз республикадин мулкара улакьрихъ галаз алакъалу 1441 авария регистрация авуна. Рекьерал арадал атай и чIуру агьвалатрин нетижада 320 кас кьена (абурукай 261 касди агьвалат кьиле фейи чкадал чан гана).
Делиларни рекъемар къурху кутадайбур, инсанрин мусибатдин кьисметар къалурзавайбур я. Аварийрин нетижада телеф хьайи гьар сад са нин ятIани багъри, дуст тир.
Вирибуру рикIел хуьн герек я хьи, рекьера хатасузвал хуьн гьар садалай аслу я. Гзаф дикъетлу хьун, рекьера гьерекат авунин къайдайрал амал авун важиблу я. Гьар сеферда рулдихъ ацукьдайла, неинки жуван, гьакI улакьар гвай масабурун уьмуьрдинни сагъламвилин патахъай жавабдарвал хиве гьатзавайди фикирдай акъудмир.
Наркотикар жагъана
Дербент шегьердин 38 йисан яшда авай агьалидин кIваляй Дагъустандин МВД-дин УКОН-дин къуллугъчийриз наркотик квай набататдин жуьредин затI (137 грамм) жагъана.
Полициядин къуллугъчийри ам вахчуна. Пешекарри тестикьарайвал, ам марихуана тир. Кьунвай агьалиди малумарайвал, наркотикдин набатат ада шегьердин къерехдай атIана ва вичи ишлемишун патал хвена.
Силисди шак фенвайда гайи малуматрин якъинвал ахтармишзава.
«Лезги газет»
