Мукьвара “ЦIийи Кавказ” издателрин дестедини “Куьредин ярар” культурадин центради Эминхуьряй тир  Къафлан  Османован  “Ша лагь заз…”   ктаб чапдай акъудна. Им адан сад лагьай ктаб я.

1947-йисуз дидедиз хьайи, яргъал йисара “Аламишинский” совхозда агрономвиле, парткомдин секретарвиле, Эминхуьруьн юкьван школада тарихдинни обществознанидин муаллимвиле кIвалахай Къафлан Османован ктаб 112 чиникай ибарат я. Ктабда шиирар,  Хутаргърин хуьруьн тарихдикайни хуьруьнвийрин кьисметдикай кхьенвай  макъала гьатнава.

Шииррай кьатIуз жезвайвал, гзаф йисара гьуьрметлудаказ яшамиш хьайи уьмуьрдин юлдаш рагьметдиз фин Къ.Османоваз рикIин тIал хьанва. И кар “Зун шезва”, “Зун Худадиз  мус къведа язух?”, “Ша лагь заз…”, “Пакадин югъ гьикI акъудин?” ва маса шииррай аквазва. Къафлан Османоваз чна ктаб мубаракзава.

Хазран Кьасумов