Алатай гьафтеда Москвада РД-дин Общественный палатадин гражданвилин жемият тешкилунин ва инсанриз Конституцияди ганвай ихтиярар хуьнин рекьяй кардик квай Комитетдин председатель Ислам Мегьамедованни РФ-дин Президентдин Администрациядин руководителдин заместитель Мегьамедсалам Мегьамедован арада гуьруьш кьиле фена.
“Лезги газетдиз” республикадин Общественный палатадин пресс-къуллугъди хабар гайивал, гуьруьшдин вахтунда абуру гьукумдин органрин ва гражданвилин жемиятдин институтрин арада авай алакъаяр мягькемаруниз, халкьарин арада дуствилин алакъаяр вилик тухуниз ва Украинада кьиле физвай махсус серенжемда иштиракзавай дагъустанвийрин хизанриз яшайишдин рекьяй куьмекар гуниз талукь месэлаяр веревирдна.
Къейд ийин хьи, РД-дин Общественный палатадин векилри серенжемдин иштиракчийрин хизанриз жуьреба-жуьре куьмекар гунин рекьяй тайин тир кIвалах кьиле тухванва. И кардикай 6-мартдиз Махачкъалада кьиле фейи совещанидал Дагъустандин Кьил Сергей Меликовани лагьана.
“Эхиримжи пуд йисан къене республикадин Общественный палатади бегьерлудаказ зегьмет чIугуна. Жуьреба-жуьре фондарихъ галаз санал абуруни дяведин гьерекатрин иштиракчийриз куьмек гун патал арадал гъанвай “Мы вместе” фондуник чпин пайни кутунва. Гьа са вахтунда Общественный палатади жемиятдин диалог тешкилунин, яшайишдин бязи къал алай месэлаяр гьялунин ва са жерге маса крарин гьакъиндай вичихъ авай мумкинвилер гьамиша менфятлудаказ ишлемишнавач”, — лагьана С.Меликова.
Ада гьакIни къейд авурвал, алай йисан июлдин вацра Общественный палатадин 7-созывди вичин кIвалах акьалтIарзава. Сергей Меликован гафаралди, кьабулдай цIийи созывди винидихъ къейд авур ва са жерге маса месэлайриз талукь яз кьиле тухудай кIвалах гуьнгуьна тун герек я.
Чи мухбир
