Тарихдиз вил вегьена, виликрай кардик хьайи, общественный девлет, низам-къайда хуьнин, чIехи-гъвечIивилиз гьуьрметунин куьмекчияр хьайи бязи тешкилатар рикIел хкиз кIанзава. Къуй къенин жегьилриз, мектебра кIелзавайбурузни, юлдашвилин суд, общественный совет, общественный дружинник, советдин депутат чир хьурай. Абурун арада общественный палатадин членди кьетIен чка кьазвай. Эхиримжи вахтара и тIварцIиз еке гьуьрмет хъхьанва, авторитетни вине ава. Хуьрера, районра, шегьеррани общественный палатадин членри жуьреба-жуьре месэлаяр гьялдайла, ахтармишдайла, тапшурмишнавай кIвалахар гьикI тамамарзаватIа килигдайла администрацийриз вижеваз куьмекар гузва, кимивилер, гьакъикъи тушир делиларни малуматар дуьздал акъудзава.
Общественный палата СтIал Сулейманан райондани кардик кваз гзаф вахтар я. Адан кьиле вичи виликрай и райондин партийный тешкилатдин секретарь яз бегьерлудаказ кIвалахай Алимет Алиметович Мейланов акъвазнава. Мукьвара ада алатай йисуз кьиле тухвай кIвалахдин гьахъ-гьисаб кьуна.
А.Мейланова ихтилат авурвал, алай йисан кIвалахдин пландин бинедаллаз и йикъара райондин центральный больницада кIвалах гьикI тешкилнаватIа килигиз, ахтармишиз общественный палатадин са десте членар чкадал фена. Эхиримжи йисара ина хьанвай цIийивилерихъ, духтурриз яратмишнавай кIвалахдин шартIарихъ, кьилинди, начагъбур сагъарун патал медицинадин идарадихъ авай мумкинвилерихъ ЦРБ-дин кьилин духтур Жафер Къурбанисмаилов, мад са шумуд духтур, медсестраяр галаз таниш хьана.
Больницадихъ дегишвилер авазва. Ам хъсандиз ремонтнава, аваданламишунин кIвалахар тухванва. Палатайра михьи ва экуь я. Начагъбур са артух аваз аквазвачир. Авайбурухъ са шумуд палатада духтурар, медсестраяр гелкъвезвай. Вахт-вахтунда абуруз герек дарманар, кфетлу хуьрекарни гузвай. Чимивилин режим хуьзва, целди герек вири чкаяр таъмин я. Аялар патал виликрай ина авачир, кьилдин регистратура, абур патал кабинет, рикIин УЗИ-дин кабинет кардик кутунва. Эквериз вегьинин кIвалахдани хъсан патахъ дегишвал хьанва. Чун пищеблокдиз, дарманрин складдизни килигна. Акурвал, анра лазим тир продуктар, къулай тадаракар, газ, экв, яд ава. Чаз ихтилат авурвал, кефсузбуруни лагьайвал, духтурри чпин везифаяр намуслудаказ кьилиз акъудзава.
ЯтIани, кимивилерни авачиз туш. Абурукай кIвалахдин эхирдай яру пипIе нетижаяр кьадайла, А.Мейланова, Гьуьсейнова, З.Загьирова ва и цIарарин авторди, кьилин духтурди вичини лагьана. Кьилди къачуртIа, сарарин духтурдиз цIийи тадаракар, тади куьмекдин къуллугъдиз кьилдин чка герек я. Вилерин кабинетдиз герек дарманар бес жезвач. Бес тежезвай духтуррин къайгъуйрик хьана кIанзава ва икI мад.
“Герек къуллугърихъ галаз месэлаяр санал гьялна, кIвалах мадни хъсанарда”, — лагьана кьилин духтур Жафер Къурбанисмаилова. Чнани и кардик умуд кутазва.
Райсудин Набиев
