И  йикъара  чун  СтIал  Сулейманан райондин Сийидрин хуьруьн фельд­шервилинни акушервилин пунктуниз (ФАП) фена, анин кIва­лах­рихъ галаз таниш хьана. ФАП хуьруьн юкьвай фенвай шегьре рекьин къерехдал алай са мертебадин дараматда кардик ква. Рехъ галай патахъай и дараматда библиотека ва туьквенни ава. Далу патахъай гъвечIи-гъвечIи кьуд кIвал фельдшервилинни акушервилин пунктунив гва.

Алай вахтунда ФАП-дин заведующий 2021-йисуз Каспийскдин медицинадин училище акьалтIар­навай жегьил пешекар Гуьлназ  Исмаилова я. Ана фельдшерди, акушеркади ва аялрин медсестрадини кIвалахзава.

Г.Исмаиловади чаз лагьайвал, фельдшервилинни акушервилин пунктунин медработникри хуьре яшамиш жезвай 1226 касдиз медицинадин рекьяй къуллугъзава. Хуьруьн агьалийрикай 252 кас 18 йисал къведалди яшара авай ая­лар ва жа­ванар, 137 кас 15 йисалай 50 йисал кьван яшара авай ­дишегьлияр я. Агьалияр ФАП-да кьабулунилай гъейри, медици­надин работникар мукьвал-мукьвал яшлу ксар, набутар, аялар авай кIвалеризни физва, абурун сагъламвал ахтармишзава, ла­зимвал авайбуруз медицинадин рекьяй куьмекар гузва. Дарманралди, герек маса шейэралдини ФАП таъмин я. Амма … медра­ботникри лагьайвал, чазни акурвал, фельдшервилинни акушервилин пунк­туна дарискъал я. Куьгьне дараматни хьайила, анин ра­ботникрал агьалияр кьабулунин, абурун сагъламвал ахтармишунин, медици­надин рекьяй чкадал куьмек гунин карда четинвилер пара ацалтзава.

Чна ФАП-да чимивал гузвай, хуьзвай гьалдизни фикир гана. Ана газдин гъвечIи пичер эцигнава. Чимивал пис туш, амма пичери вахтунин истемишунриз жаваб гузвач.

Сийидрин хуьруьн фельдшервилинни акушервилин пункт куьгь­не­ ва дарискъал дараматда кардик хьуникай рахадайла, къейд ийиз кIан­зава хьи, эхиримжи йисара “Здравоохранение” ва “Здравоохраненидин сифтегьан хилен идараяр цIийи­кIа туькIуьр хъувун” госпрограммайрай, санлай уьлкведа хьиз, Дагъустан Республикада, гьабурукай яз чи райондани тайин кIвалах тухванва, и кар давамарни ийизва. Мисал яз, эхиримжи йисара са шумуд хуьре медицинадин цIийи дараматар (гьабурукай яз мо­дульный ФАП-ар) эцигнава. Умуд ку­таз кIанзава хьи, ихьтин “экв” сийид­вийризни аквада.

Хазран  Кьасумов