ЦIийи жуьредин загранпаспортар гун алай йисан 2-февралдилай вахтуналди акъвазарнава. Идакай чаз РД-дин МФЦ-дин кьилин идаради хабар гана. Ихтилат биометрический паспортрикай физва. Акъвазарунин себеб “Гознак” тешкилатдихъ паспортдин бланкдик кутазвай махсус микросхемаяр тахьунихъ галаз алакъалу я. Ихьтин паспорт къачун патал арзаяр вуганвай ватандашриз абур алай йисан кьвед лагьай кварталда гьазурда.
Эгер агьалийриз къецепатан уьлкведиз финин чарасузвал аваз хьайитIа, ихьтин дуьшуьшра куьгьне жуьредин, 5 йисан муддатда къуватда жедай загранпаспорт къачудай мумкинвал ава. И кар кьилиз акъатун патал агьалийривай гьа эвелдай арза вугай МФЦ-диз хабар гуз жеда. Документ вич лагьайтIа, 5 йисан паспортдин госпошлина виликамаз гуналди, миграциядин месэлайрин управленида туькIуьрзава. Биометрический паспортар гун гуьнгуьна гьат хъувурдалай кьулухъ кьвед лагьай паспортни къахчуз жеда. Ватандашдив са вахтунда кьве загранпаспорт хьун къанунди къадагъа ийизвач.
Эгер арзачиди паспорт къачун герек амачирди яз гьисабайтIа, адав госпошлина элкъуьрна ахгакьарзава. Документ къачун патал МФЦ-да арза вугайбур ихьтин дуьшуьшда миграциядин месэлайрин подразделенидиз фена кIан жеда. ЦIийи жуьредин паспорт къачун патал “Госкъуллугъар” порталдин куьмекдалди арза вуганваз хьайитIа, ведомстводин патай арзадиз хкведай жаваб гуьзета ва, инструкциядал асаслу яз, кар кьетI ая.
Къейдзавайвал, 2022-йисуз загранпаспорт къачун патал республикадин МФЦ-дин идарайриз 17,5 агъзур касди арзаяр вугана.
Росреестрдин къуллугъар
РД-да авай Росреестрдин управленидин къуллугъар герекзавайбурувай электронный къуллугъдикай менфят къачуз жеда. И кар идарадин официальный сайтдин хсуси кабинетда кьилиз акъудиз жезва.
Кьилди къачуртIа, хсуси кабинетда кадастрдин учетдин ва ихтияррин государстводин регистрация туькIуьрун патал документар вугуз, юзан тийидай объектдин малуматра авай техникадин ва я реестрдин гъалатIар туьхкIуьруниз ва ЕГРН-дай выписка къачуниз талукь арзаяр ракъуриз жеда.
«Лезги газет»
