Намуслу, вафалу хва тир
Абдулашим Муртузалиев СтIал Сулейманан райондин Уллу-Гъетегърин хуьре 1913-йисуз дидедиз хьана. Ада сифтегьан чирвилер Бакуда къачуна. Анай хтайла ВЛКСМ-дин Кьурагь райкомда кIвалахна.
1931-1932-йисара ВЛКСМ-дин Дагъустандин обкомдин тапшуругъдалди Чечен округдин Ножай-Юртдин райкомда кIвалахна. 1933-1935-йисара Рутул районда халкьдин силисчи, Кьасумхуьрел прокурор, Ахцегьа халкьдин судья, Усугъчайдал прокурор яз кIвалахна.
Къуллугъдин рекьяй хкаж хьуни, халкьдин арада гьуьрмет къазанмишуни пехил ксар майдандиз акъудна. А вахтара, фитнекарар себеб яз, са тахсирни квачир инсанар дустагъра твазвай. Гьа икI, са карни авачиз, гьар жуьредин буьгьтенар вегьена, Абдулашим Муртузалиеваз 8 йисан кар атIана, ам дустагъда туна. Дустагъда адан сагъламвилиз екез таъсирна. Вичел гъанвай гьахъсуз лекедин патахъай ада Россиядин Верховный суддиз арза кхьена.
А.Муртузалиев гзаф чирвал авай, кар алакьдай кас тир. Дустагъдай хтайла, ада Уллу-Гъетегърин “Ударник”, Татарханрин “Победа” колхозра счетовод, бухгалтер, Кьасумхуьруьн культурадин кIвалин директор яз кIвалахна. Адвокат яз кIвалахдайла, дуьшуьшдай суддик акатай цIудралди жегьилар А.Муртузалиева аникай хкудна. Адан чирвилер, алакьунар акурла, яб акализ ацукьнавайбур, аламат хьана амукьдай.
Инсандиз гьикьван писвал ийиз алахъайтIани, гьахъвал кIандай, намуслу инсанарни авачиз тушир. А.Муртузалиев ВКП(б)-дин членвиле кьабулун патал Кьасумхуьруьн райондин прокурор Саид Омарова, райондин госбанкдин управляющий Жафер Мансурова, райсберкассадин заведующий Шикерхан Ибрагьимова (абуруз А.Муртузалиев кар алакьдай, хъсан хатI авай, халкь патал алахъзавай кас тирди фадлай чизвай) теклифдин чарар кхьенай.
Гуьгъуьнлай А.Муртузалиев Кьасумхуьруьн райфинотделдин ревизорвиле тайинарна. Ам вичин гафунал акъваздай, гафунин жавабни гудай кас тир.
Дяведин лап четин вахтара ам Кьасумхуьруьн райторгдин председателдин къуллугъдал тайинарна. Халкьдиз недай ва маса шейэр талонрай гузвай. Каша гьатнавай гзаф инсанар рекьизвай. Кьасумхуьрел душманрин гьужумрикай куьчарнавай Украинадин, Белоруссиядин агьалиярни атанвай.
Абдулашим Муртузалиев йифен кьуларизни, нафтIадин лампадин экуьнал кабинетда кIвалахиз, рикIинихъ галай каша кьунвайбуруз са кIус кьванни фу артухардай рекьер жагъуриз алахъна. И гьал дяведилай гуьгъуьнин йисарани амукьна.
Гъетегъви зи мирес, кьегьал хва, вичин уьмуьрдин эхирдалди Ватандиз, халкьдиз, хуьруьнвийриз намуслудаказ вафалу хьана.
Вичин кьилел атай кьван татугайвилер эхиз тахьай ам яргъал чIугур залан азардикди 1947-йисуз, 34-йисан яшда аваз, рагьметдиз фена.
Ада чIехи дережада авай хуьруьнвияр тир Гьабибов Абдулагьан, Сейфуладин, Абилован, Юсуфован, Фаталиеван, Рамазанован, Гьажимуслимован, С.Керимован арада лайихлу чка кьуна. Баркалла чпиз.
Вадим Жамалдинов
