Дербент райондин “Коррупциядихъ галаз женг чIугунин комиссия” ДРОО-дин районрин уртах отделдин кьил Мурад Керимован регьбервилик кваз Белиждин гимназияда тIвар кьунвай комиссиядини “ВДВ-дин ветеранрин женгинин стхавал — Юждаг” тешкилатдин саналди тир мярекат кьиле фена. Ам Украинада кьиле физвай махсус серенжемдин иштиракчийриз куьмек гуниз талукьарнавай.
Мярекатдиз теклифнавай мугьманрин арада Белиж поселокдин администрациядин кьил Рамиз Гьабибуллаев, РД-дин коррупциядихъ галаз женг чIугунин комиссиядин регьбер Расул Гьажимусаев, Дербентдин погранкъуллугъдин векил Евгений Шляхов, Афгъанистандин дяведин иштиракчияр — Абил Межидов, Мисрихан Герейханов, Мегьамедкьасум Салигьов, Белиж поселокдин ОВД-дин начальник Сейран Гьуьсейнов, полициядин майор Ражидин Эмирбегов ва Мурадали Мамаев, ЦIийи Фригърин мектебдин директор Райфудин Исламов ва масабур авай.
Мярекатдиз атанвайбурун вилик бязибуру чпин фикирар лагьайдалай ва теклифар гайидалай гуьгъуьниз Мурад Керимова къейдна:
— Гьуьрметлу дустар! Украинада военный махсус серенжем Донбасс ва гьакI чи уьлкве фашистрикай хуьн патал кьиле тухузва. Чун, инал кIватI хьанвай Афгъанистандин ветеранрин Союздин, Кьиблепатан Дагъустандин ВДВ-дин ветеранрин женгинин стхавилин “Юждаг” тешкилатдин ва жемиятдин векилар инанмиш я хьи, махсус серенжем куьтягь жеда ва чи аскерар гъалибвал гваз чпин хизанрин патав хкведа.
Украина яракьсуз авуник ва адан мулкар фашизмдикай азад авуник пай кутунвай иштиракчийрив “Женгинин махсус серенжемдин иштиракчи” лагьай шабагьар вахкана. Абуруз лайихлу хьанвай 20-дакай 12 кас Хив райондин ЦIийи Фригърин хуьруьн жемятдин векилар я.
Абдул Ашурагъаев
