И йикъара Пермь шегьерда самбодай ва женгинин самбодай (гьам итимрин ва гьамни дишегьлийрин арада) кьиле фейи Россиядин чемпионатда чи уьлкведин 70-далай виниз регионрай 700-дав агакьна спортсменри чпин устадвал къалурна. Абурун арада спортдин лайихлу мастерар (33), спортдин международный классдин мастерар (94), спортдин мастерар (315) ва спортдин мастервиле кандидатар (170) авай. Шад жедай кар мадни ам я хьи, и акъажунра Дагъустандин хкянавай командадик кваз иштиракай, вичин ери-бине СтIал Сулейманан райондин Алидхуьрелай тир машгьур сихилдин (бубадин ва имийрин спортдин рехъ гьунарлудаказ давамарзавай) векил Аслан Къурбанова самбодай 88 кг-дал къведалди заланвал авайбурун арада къизилдин медаль, уьлкведин чемпионвилин тIвар къазанмишна. Мубаракрай!
Санлай къачурла, Россиядин чемпионатда Дагъустандин хкянавай команда 2-чкадиз лайихлу хьана. Чи спортсменри къизилдин — 4, гимишдин — 1 ва буьруьнждин 5 медаль къазанмишна. А.Къурбанова 4 бягьс кьиле тухвана. РикIел хкин, идалай вилик уьлкведин чемпионатра чи ватанэгьлиди са шумудра приздин чкаяр кьуна. Аслан самбодай Россиядин спортдин мастер, универсальный бягьсерай спортдин международный классдин мастер, Европадин ва дуьньядин са шумуд сеферда чемпион я. Ада Россиядин ФСИН-дин Дагъустанда авай Управленида зегьмет чIугвазва, ам къенепатан къуллугъдин капитан я.
Пуд юкъуз ва кьуд гьасирдал кьиле фейи Россиядин чемпионатдин кесерлувал мадни адакай ибарат я хьи, ана гъалиб хьайи спортсменри — дуьньядин, приздин чкаяр кьурбуру Европадин чемпионатра Россиядин хкянавай командайрик кваз чпин устадвал къалурдайвал я. Самбодай международный федерациядин (ФИАС) мукьвара кьиле фейи конгрессдал малумарайвал, алай йисуз дуьньядин чемпионат Эрменистандин меркез Ереванда (виликдай Египетда кьиле тухун пландик квайди тир) ноябрдиз кьиле фида. Аслан анай гъалибвал гваз хтуник умуд кутазва.
Рагнеда Рамалданова
