19-мартдиз «Лезги газетдин» редакциядини «ЛЕКИ» фондуни СтIал Сулейманан райондин Эминхуьруьн юкьван мектебда лезги чIалайни эдебиятдай чIехи олимпиада кьиле тухуда.
ЦIи пуд лагьай сеферда тешкилзавай и мярекатда кIвенкIвечи 10 чка тайинарнава. Гъалибчийриз пулунин пишкешар, дипломар, ктабар гуда. Кьилди къачуртIа, 1-чкадиз — 30, 2-чкадиз — 25, 3-чкадиз — 20, 4-чкадиз — 15, 5-чкадиз — 12, 6-чкадиз — 10, 7-чкадиз — 8, 8-чкадиз — 7, 9-чкадиз — 6 ва 10-чкадизни 5 агъзур манатдин кьадарда авай пулунин пишкешар чара ийида. Дипломризни пулунин пишкешриз абурун муаллимарни лайихлу жеда.
Къейд ийин хьи, олимпиада 10-классра кIелзавай аялрин арада тухузва. Мярекатда гьар са мектебдин патай анжах 1 аялдиз иштиракдай ихтиярар ава.
Мярекатдиз Ахцегь, Докъузпара, Мегьарамдхуьруьн, Дербент, Кьурагь, СтIал Сулейманан, Хив, Хасавюрт районрин, Дербент, Дагъустандин Огни шегьеррин мектебра кIелзавай аялриз теклифнава.
«Лезги газет»
