Са шумуд югъ идалай вилик Арабрин Сад хьанвай Эмиратрин Шарджа шегьерда каратэдай международный акъажунар кьиле фена. Ана дуьньядин 19 уьлкведай тир 600-далай виниз спортсменри чпин алакьунар къалурна. Абурун арада Россиядин хкянавай командадик кваз вичин ери-бине Ахцегь райондин Кьакарин хуьряй тир Агьмед Агьмедова 67 кг-дин заланвал авай итимрин арада къизилдин медаль къазанмишна.
Каратэдал Агьмед 5 йисалай инихъ машгъул жезва. Россиядин ва Европадин кIвенкIвечивал патал акъажунра ада гъалибвилер садрани-кьведра къазанмишнавач. Самбодайни вичин устадвал къалурзавай ам Россиядин хкянавай командадик ква. И жуьредай ам Приволжский федеральный округдин кIвенкIвечи, Россиядин чемпионатрин призер я.
Алай вахтунда чи ватанэгьли Саратов шегьерда яшамиш жезва. Ам и шегьердин виридалайни викIегь каратист яз гьисабзава. Ина ада вичин буба Ихтибар Агьмедован гъилик спортдин рекьяй устадвал хкажзава. Къуй чи ватанэгьлидихъ мадни еке агалкьунар хьурай!
Чи мухбир
