Гуьзел гатфарин сифте йикъара лезги халкьдин  лайихлу векилрикай сад, гьакъи­сагъ­ зегьметчи  яз жемятдин  арада кьетIен гьуьрмет къазанмишай бубадин хва ва  дагъви халкьдин михьи ивирралди вичин  хтулар тербияламишзавай буба Мегьамедов ­Мегьамед  Мейлановича   70 йисан юбилей къейдзава. Уьмуьрдин гьи легьзеда хьайи­тIа­ни, кIвалахдин яцIа хьайи адан гзаф йисарин гьа­къисагъ зегьмет и мукьвара РД-дин транспортдин ва рекьерин майишатдин  министерстводин Гьуьрметдин грамотадалдини  къейднава. Мубаракрай!

Мегьамед Мейланович  СтIал Сулейманан райондин ЦицIигърин хуьре Ватандин ЧIе­хи дяведин иштиракчи ва зегьметдин ветеран Мейлан бубадин ва Сувар дидедин хизанда 1953-йисан 2-мартдиз дуьньядал атана. Хайи хуьре сифтегьан мектеб  акьал­тIа­рай Мегьамед 1964-йисуз, жемят СтIал Су­лейманан райондин  Агъа СтIалрин  кIаник квай чилел куьч хьун себеб яз, СтIал-Къазмайрин школадиз хквезва. Зиринг ва зегьмет­дал рикI алай Мегьамед тарсарилай гуьгъуь­низ дахдихъ галаз цIийи кIвалер эцигзавай чкайра аквадай.

Буба Мейлан устIар итим тир. Ам пара секин, дугъри, вичикай садни бейкеф тавур ва гьардаз вичелай алакьдай хъсанвал авур кас тир. УстIардин куьмек герек яз, вуж атай­тIани, ам, вичин гъилевай карни туна, фидай.  Лугьуз жеда хьи, саки вири хуьруьнвийрин  кIвалерик адан гъилерин, зегьметдин пай ква.  Ада гьакI хуьруьн, райондин общественный дараматар (Кьасумхуьруьн больница, школа)  эцигунин кардани  активнидаказ иштиракна. Веледриз ам гьар са карда чешне тир.

Бубадиз куьмек гуз гьерекатзавайтIани,  мектебдани гадади  усалвал ийизвачир. Адан рикIе кIелун давамарунин ва уьмуьрдин пеше къачунин къаст авай.

1968-йисуз 8-класс акьалтIарай, бегьем урус чIал чин тийизвай жаван Махачкъаладиз­ къвезва ва хуьруьн майишатдин техникумдиз гьахьзава. КIелдай йисар акуна-такуна акъатна. Армиядин жергейра жегьилди Къазахстандин Джамбул шегьерда къуллугъна. Инани сер­жантди регьбервал гузвай отделениди кIвен­кIвечи  чкаяр кьазвай. Адан алакьу­нар ко­мандирди Гьуьрметдин грамотадалди къейд­на. Мегьамед Мейлановичан тIвар воен­ный частунин Гьуьрметдин ктабда гьамишалугъ яз кхьенва.

Зегьметдин рехъ ада РД-дин хуьруьн майи­шатдин министерствода чилериз талукь отделдин пешекар яз башламишзава. Гьа са вахтунда ам Москвадин  инженерринни землеустройстводин институтдиз гьахьзава. Анаг, кIвалахдивай къерех тахьана, агалкьунралди акьалтIарай  гила кьилин инженерди, тежрибалу пешекарди вичин везифаяр мадни инанмишвилелди кьилиз акъудиз башламишна. Къейд ийин, республикада и вуздин диплом гвай пешекарар са акьван гзаф авач.

Къал квай, делилар какахьнавай, гьуьже­тар арадал къвезвай  чкайриз Мегьамед рекье тваз хьана. Пешекардиз, гьелбетда, гьуь­жетда авай кьве падни гъавурда туналди, месэла законди истемишзавайвал гьялун­ хас я. Бязибуру, ам “сакIани гъавурда гьат тийидай кас я” лугьуз, шикаятарни ийидай, амма руководство вичин пешекардилай рази тир, чухсагъул лугьузвай.

1991-йисуз госагропромар чукIурайдалай гуьгъуьниз чи республикада  чилерин реформадиз  ва абур туькIуьр хьуниз талукь Госкомитет тешкилна. Мегьамед Мейланович чилерал гуьзчивалдай  отделда кьилин пешекардин къуллугъдал тайинарна. Гуьгъуьнлай адакай чилер хуьнин ва абурукай менфят  къачунал гуьзчивалдай отделдин начальник, гьа са вахтунда чилер ишлемишунин ва абур хуьнин рекьяй Дагъустан Республикадин  кьи­лин госинспектордин заместителни хьана. Гуьгъуьнлай РД-дин Роснедвижимостдин Управленида (гилан Росреестр) зегьмет чIу­гуна. Жуьреба-жуьре къуллугърал кIва­ла­хай  вири йисара Дагъустан Республикада чилерин реформа кьиле тухуник, чилериз талукь месэлаяр гьялуник Мегьамед Мейлановичан  ла­йихлу пай ква. Адан иштираквал аваз республикада лежбервилин (фер­мервилин) майи­шатар, хсуси куьмекчи майи­ша­тар, саки 5 агъзур гектардин майданра  багълар ва бустанар кутуна. Агьалийри яша­йиш­дин кIвалер эцигун патал агъзурралди участокар чара авуна. Хуьрерин ва поселокрин ихтиярдиз  миллион гектардилай  виниз чилер вахкана.

Неинки чилерин, гьакI умуми законодательстводикай хабар авай, гьахъ-адалат гвай  Мегьамед Мейлановичахъ, гьина кIвалах­на­тIани, вири коллективра еке гьуьрмет ва ихтибар авай.

ИкI, ам са шумуд сеферда комсомолрин тешкилатдин секретарвиле, хуьруьн майишатдин министерстводин  профкомдин членвиле хкязава. 2006-йисалай РД-дин Роснед­ви­­жимостдин Управленидин профкомдин пред­седатель, гуьгъуьнай  АПК-дин президиумдин член жезва.

Накьвар хуьнин  жигьетдай лап хъсан пешекарвилин тIвар  патал кьиле тухвай конкурсра гъалибвал къазанмишай  М.Мегьамедоваз  “СССР-дин хуьруьн майишатдин отличник” тIвар гана. Вичин везифаяр устадвилелди­ кьилиз акъудзавай ам “Россиядин Федерация­дин лайихлу землеустроитель” ла­гьай гьуьрметдин тIварцIин, са жерге медалрин  сагьибни я. 2010-йисуз  Дагъустан Рес­­публикадин Гьуьрметдин грамотадиз лайихлу хьана.

Мегьамед Мейлановичан  шабагьрин арада адан кIвалахдин ваъ, инсанпересвилин  терефдикай хабар гузвай сад ава — “Батмиш жезвайбур къутармишунай”. 1984-йис тир. Ам кIвалахдин рекьяй са идарадиз физвай.  Меркездин юкьвай физвай КОР-див агакьайла, адаз къаналдин къерехдай аялрин гьарайдин ванер атана — абуру гадайрикай сад циз аватнавайдакай хабар гузвай.  Мегьа­меда парталарни алаз тадиз, циз хкадарна, 8 йиса авай  аял къутармишна…

Яшар хьун себеб яз, кIвалахдилай эля­чIайдалай кьулухъ  М.Мегьамедова “Махачкъаладин гьуьлуьн алишверишдин порт”  АО-да эменни идара авунин рекьяй кар алай пешекар яз кIвалахиз  им вад йис  я.

Мегьамед  ва Мая Мегьамедоврин хизанда кьве рушни са хва хьана. Чирвилерин, ин­санвилин хесетрин  къимет чизвай диде-бубади чпин веледарни  лайихлудаказ тербияламишна. Филолог Альбинади ва юрист Сабинади, ДГУ акьалтIарна, чпин пешейрай кIва­лахзава. Хва Вадим экономист тир (гьа­йиф хьи, залан азарди ам багърийривай къа­къуд­на. Рагьмет хьурай вичиз).

Мегьамед Мейлановичан рикI 12 хтулди  ша­дарзава. Абурун арада чIехи бубадин тIвар эхцигнавай Мейланни (ада Уралдин госуни­вер­­­­ситетда праводин факультетда кIелзава), чIе­­хи дидедин тIвар алай Суварни (Газпромдин поликлиникада медсестра яз кIвалах­зава) ава.

Къуй абурухъ галаз алакъалу вири умудар­ Аллагьдин куьмекдалди кьилиз акъатрай.

Жасмина Саидова