“Хатасуз ва ерилу рекьер” проектдин сергьятра аваз СтIал Сулейманан районда “Мамрач-Ташкапур-Аракандин муьгъ” шегьре рекьин 10 лагьай километрдилай 15 лагьай километрдал кьван мензилда капитальнидаказ ремонт авунин кIвалахар башламишнава, хабар гузва РД-дин транспортдин ва рекьерин майишатдин министерстводин пресс-къуллугъди.
Автомашинрин “Мамрач-Ташкапур-Аракандин муьгъ” шегьре региондин виридалайни яргъи рехъ я. Ада Дагъустандин 8 райондихъ галаз транспортдин алакъа таъминарзава ва, и кар себеб яз, ада республика экономикадинни яшайишдин рекьяй виликди тухунин карда важиблу чка кьазва.
Капитальный ремонтдин сергьятра аваз шегьредин агъа къат (диб) мягькемарун, яд ачухдаказ фидай турбаяр эцигуналди, рекьивай артухан яд къакъуддай система цIийи хъувун, рекьин къерехар мягькемарун ва лазим къайдада туькIуьрун, гьакIни асфальтдинни бетондин къат цIийи хъувун фикирда кьунва.
ГьакIни объектдал рекьера хатасуздаказ гьерекат авунихъ элкъуьрнавай вири серенжемар кьиле тухун фикирда кьунва. Гьа жергедай яз, рекьерин къерехра жедай жугъунар, сигналдин даяхар, рекьерин цIийи лишанар эцигда, ишигъламишда ва икI мад.
Алай вахтунда объектдал рекьин бине гьазурунин ва чил ацукьнавай чкайрал накьвадин къат дегишарунин кIвалахар кьиле тухузва.
Гьар юкъуз объектдал рекьерин ва эцигунардай махсус жуьре техникадин тахминан 30 машинди кIвалахзава. Государстводин икьрардин бинедаллаз, алай йисан июндиз рекьин 3,5 километрдин мензил кардик кутун фикирда кьунва. Амай 1,5 километрдин рехъ ишлемишиз вахкуналди, капитальный ремонтдин кIвалахар 2024-йисан июндиз акьалтIарун фикирда кьунва, хабар гузва РД-дин транспортдин ва рекьерин майишатдин министерстводин пресс-къуллугъди.
Идалайни гъейри, “Хатасуз ва ерилу рекьер” милли проектдин сергьятра аваз, 2023-йисуз Дагъустанда, санлай къачурла, 441 метрдин яргъивал алай кьуд муьгъни ремонтда. ТIебии тушир тадаракар лазим тир къайдадиз гъунин кIвалахар Мегьарамдхуьр-Ахцегь-Рутул шегьре рекьин Докъузпара райондин мулкунал алай 40-54 километрдин мензилда кьиле тухуда. Ремонтдин кIвалахрин сергьятра аваз, и участокда рекьерин пешекарри, санлай къачурла, 435 метрдин яргъивал алай пуд муьгъ цIийи хъийида.
Мад са муьгъ СтIал Сулейманан райондин “Мамрач-Ташкапур-Аракандин муьгъ” шегьре рекьин 23-30 лагьай километрдин участокдик акатзава. Муькъуьн яргъивал 6 метрдиз барабар я.
РикIел хкин, “Хатасуз ва ерилу рекьер” милли проектдин сергьятра аваз, Дагъустанда 2023-йисуз 59,5 километр шегьре рекьер ремонт авун пландик кутунва. И рекьиз, санлай къачурла, 2 миллиардни 247 миллион манат чара авунва, адакай 1 миллиардни 67 миллион манат федеральный бюджетдин такьатар я.
«Лезги газет»
