Республикадин шегьреяр ремонт авуниз, туькIуьруниз ва лазим къайдада хуьниз 2023-йисуз Дагъустанда, санлай къачурла, 14,9 миллиард манат харждайвал я. Идакай и йикъара кьиле фейи 2022-йисуз авур кIвалахрин нетижаяр кьадай коллегиядал РД-дин транспортдин ва рекьерин майишатдин министр Жамбулат Салавова хабар гана.
“Санлай къачурла, 2023-йис патал Дагъустан Республикадин транспортдин ва рекьерин майишатдин министерстводиз бюджетдин мажбурнамайрин бинедаллаз 14,904 миллиард манат (гьа жергедай яз 1,449 миллион манат федеральный бюджетдай) чара авун тестикьарнава”, — малумарна Ж.Салавова.
ИкI, 2022-йисуз и кьадарди 14,022 миллиард манат тешкилзавай (1,17 млрд — федеральный такьатар). А чIавуз республикада цIийикIа туькIуьр хъувуна ва цIийиз тухвана 77,8 километр рекьер, санлай къачурла, 572 метрдин яргъивал алай 14 муьгъ, ремонт авуна (гьа жергедай яз — бинедилай) 675,3 километр рекьер ва 200,3 метр умуми яргъивал алай 5 муьгъ ишлемишиз вахканай.
“2023-йисан пуд лагьай кварталдин эхирдалди винидихъ чпикай лагьанвай такьатрин гьисабдай таъминарун пландик кутунва: цIийикIа туькIуьр хъувун ва цIийиз тухун — 40,7 километр, ремонт авун 228 километр рекьер; ремонт авун (гьа жергедай яз — бинедилай) 4 муьгъ (557 метр); къайдада аваз хуьн — 7,5 агъзур километр рекьер, муниципальный дережадин 300 километр рекьер ремонт авун”, — лагьана министрди.
ГьакIни, адан гафаралди, “Хатасуз ва ерилу рекьер” милли проект кьилиз акъудунин гьисабдай Махачкъалада, санлай къачурла, 12 километрдилай гзаф мензил рекьер ва региондин 50 километр шегьреяр ремонтдайвал я. Идалайни гъейри, БКАД-дин сергьятра аваз, автомашинрин заланвилел гуьзчивалдай автоматламишнавай 2 пункт эцигда.
“Заз куьн инанмишариз кIанзава, руководстводи вилик эцигнавай месэлаяр ерилудаказ гьялун патал чна кIвалахда къачунвай йигинвал анжах мадни артухарда”, — лагьана идарадин регьберди.
«Лезги газет»
