20-февралдиз РД-дин Гьукуматдин Председатель Абдулмуслим Абдулмуслимов гьукуматдин делегациядин кьиле аваз Дагъустандин Кьил Сергей Меликован тапшуругъдалди кIвалахдин рекьяй Азербайжан Республикадиз фена. Идакай чи газетдиз РД-дин Гьукуматдин пресс-къуллугъди хабар гана.
Сад лагьай югъ республикадин премьер-министрди Азербайжандин игитрин экуь къаматар гьуьрметдалди рикIел хкунин лишандилай башламишна.
Къейд ийин хьи, къунши республикадиз финин макьсад Дагъустан Республикадинни Азербайжандин арада экономикадин ва гуманитарный хилерай санал кIвалахунин рекье кар алай терефар тайинарун я.
Абдулмуслим Абдулмуслимовахъ Дагъустан Республикадин Кьилин патай РД-дин Халкьдин Собранида тамам ихтиярар ганвай векил Нуьсрет Омаров, вице-премьер Рамазан Жафаров, “Аэропорт-Махачкъала” АО-дин генеральный директор Саид Рамазанов, гьакIни республикадин хуьруьн майишатдин ва суьрсетдин, транспортдин, экономика вилик тухунин, промышленностдинни алишверишдин ва РД-дин предпринимательстводин ва инвестицийрин рекьяй Агентстводин кьилер галай.
РД-дин Гьукуматдин Председатель Азербайжан Республикадин премьер-министрдин заместитель Шахин Мустафаевахъ, хуьруьн майишатдин министр Инам Каримовахъ, рекъемрин рекьяй вилик финин ва транспортдин министр Рашад Набиевахъ, экономикадин министр Микаил Жаббаровахъ галаз гуьруьшмиш хьана, Россиядинни Азербайжандин сергьятдал — “Ярагъ-Къазмаяр-Самур” пунктунал — алай логистикадин паркуниз ва Тагьирхуьруьн-Къазмайринни (РФ) Ханобадин (Азербайжан) автомобилрин пунктунал фена.
Гуьруьшдин сергьятра аваз Ш.Мустафаева Азербайжан Республикадинни Россиядин Федерациядин арада кьве патанни алакъаяр дурумлудаказ вилик физвайди къейдна. Кьилди къачуртIа, кьве президентдин чалишмишвилерин нетижада государствойрин арада алакъаяр стратегиядин амадагвилин дережадив агакьнава.
Мярекатдин сергьятра аваз терефри 2023-2025-йисара Дагъустан Республикади ва Азербайжанди санал кIвалахунин рекье кар алай терефар вилик тухунин серенжемрин Пландал къулар чIугуна.
Планда алишверишдинни экономикадин рекьерай санал кIвалахуниз ва инвестицияр желб авун активламишуниз кьилин фикир гузва. ГьакIни Планда транспортрин “Кеферпад-Кьиблепад” коридор вилик тухунин жигьетдай санал кIвалахун, кьве республикадин арада культурадинни гуманитарный алакъаяр вилик тухун, агропромышленностдин хиле сад-садахъ галаз алакъалу хьун, Россиядин Федерациядинни Азербайжан Республикадин госсергьятдал пропускдин пунктарин инфраструктура хъсанарун; “Баку-Махачкъала-Баку” авиаалакъа датIана кардик хьунин серенжемар кьабулун ва икI мад истемишзава.
Мадни кьве терефди Азербайжанда Расул Гьамзатован 100 йисан юбилей къейд авун, Дагъустанда Азербайжандин госдеятель Азиз Алиеван экуь къаматдиз бахшна серенжемар кьиле тухун пландик кутуна.
Документдин бинедаллаз гьакIни промышленностдин кооперация пайгардик кутун пландик ква. Саналди тир шуьшедин промышленностдин карханаяр арадал гъунин месэла вири патарихъай ахтармишуниз ва гимияр акъуддай заводдин хиле сад-садахъ галаз алакъалу хьуниз кьилин фикир гуда.
Абдулмуслим Абдулмуслимова Азербайжандин терефдиз чеб хушдаказ кьабулунай сагърай лагьана. Ада Азербайжандин ва Дагъустандин арада дуствилин, стхавилин кьетIен алакъаяр фадлай авайди къейдна.
Шахин Мустафаева, вичин нубатдай, Азербайжандин ва Дагъустандин халкьарин арада чпихъ умуми тарихдин, чIалан, культурадин ва руьгьдин къиметлувал авай алакъаяр са шумуд асирра давам жезвайди къейдна.
“Къе Президент Ильгьам Алиева Азербайжан ва Дагъустан республикайрин алакъайриз Азербайжандинни Россиядин арада стратегиядин амадагвилин сергьятра аваз вилик финиз кьетIен фикир гузва. Идан патахъай государстводин кьили, авай чIехи мумкинвилерикай менфят къачуна, санал кIвалахун мадни хъсанарунин тапшуругъ гуни шагьидвалзава…”, — лагьана Мустафаева.
«Лезги газет»
