Абдулкеримова Гьавизат Омаровна 1950-йисуз Кьасумхуьруьн райондин Испикрин хуьре дидедиз хьана. Шихидхуьруьн юкьван школада 10-класс акьалтIарна. Белиж поселокдин консервиярдай заводда кIвалахзавай зугьрабахуьруьнви Абидинахъ галаз хизан кутур ам кьисметди арандиз акъудна.
Ина ада сифте заводдин консервиярдай цехда рабочийвиле, ахпа, бухгалтервилин курсара кIелна, бухгалтервиле зегьмет чIугуна. Уьмуьрдин юлдашдиз кьуд велед багъишна. Пуд руш чпин хизанрин иесияр я. Гада Артура алай вахтунда махсус серенжемда иштиракзава.
Гьавизат Омаровна сад лагьай дережадин инвалид я. Яшар хьанвай гзаф инсанар хьиз, амни тIалри-квалри инжиклу ийизва. И мукьвара, алукьна, метIин кIвалакI хайила, гьалар генани пис хьана. Тадиз операция авуна кIанзавай.
Махачкъалада яшамиш жезвай руш Людмилади диде тади гьалда меркездиз гъана. Духтурар рентгендин шикилдиз килигайла, гьакъикъатдани кIараб ханвайди тестикь хьана. Квота тахьуниз ва нубатда авайбур гзаф хьуниз килигна, операция ийидай вахт яргъал аватзавай. Людмиладин къуншийриз и кардикай хабар хьайила, абуру махсус серенжемда иштиракзавайбурун хизанриз гьукуматди куьмек гузвайди рикIел гъана. Нин патав фида лугьуз, фикир авурла, РД-дин Халкьдин Собранидин Председателдин заместитель хьайи ва гилани республикадин идарайра жавабдар къуллугъар тамамарзавай Исакьов Сейфулагь Бейдуллагьович рикIел атана.
Абдулкеримоврин хизан Сейфулагь Бейдуллагьовичан диде Гуьлселеман къунши я. Адаз Гьавизат дидедин хва Артурани, гзаф кьадар маса дагъустанвийри хьиз, махсус серенжемда иштиракзавайди чизвай. Къейд ийин хьи, Артура махсус серенжемда иштиракиз вад варз жезва, ам гуьгьуьллубурун жергейрикай я.
Къуншидин хизандиз куьмек герекзавайди малум хьайила, С.Исакьова РД-дин здравоохраненидин министерстводиз ва талукь маса чкайриз зенгерна, и месэла са куьруь вахтунда гьялдайвал авуна.
И кардикай хабар хьайи Артур Абдулкеримова кар гъиле кьуна, вичин дидедиз гъиле-гъил аваз герек куьмекар гайи С.Исакьоваз, чпин везифаяр намуслудаказ тамамарай Н.Цахаеван тIварцIихъ галай травматологиядин отделенидин духтурриз, операция авур кьилин духтурдин заместитель, РД-дин лайихлу духтур Юсуп Губуловаз ва гьакI. И.А. Мамаеваз, адан куьмекчи Л.Жавадовадиз рикIин сидкьидай сагърай лагьана.
Вичин ва Украинада кьиле физвай махсус серенжемда иштиракзавайбурун патай ада ихьтин гафарни кхьенвай: “Чи далу пата, хизанра вири къайдадик квайла, гьукуматди чи хизанрин патахъай къайгъударвал чIугвазвайла, чна ина рикI секиндаказ гъалибвал къазанмишун патал командирри чи вилик эцигзавай везифаяр викIегьдаказ тамамарзава”.
Къ.Ибрагьимов
